Vedomstvo málimetinshe, is-sharaǵa 135 myńnan astam adam qatysqan. Onyń ishinde, 12 myńnan joǵary eriktiler, 47 myńnan joǵary memlekettik organdardyń ókilderi, 65 myńnan joǵary mekemelerdiń qyzmetkerleri, qoǵamdyq birlestikter men turǵyndar.
Klımattyq jaǵdaıǵa baılanysty is-shara Qazaqstannyń alty óńirinde, onyń ishinde Jambyl, Almaty, Qyzylorda jáne Túrkistan oblystarynda, Shymkent jáne Almaty qalalarynda ótti.
Qatysýshylar rekreasııalyq aımaqtardy retke keltirip, aýla mańyndaǵy nysandardy, kósheler men saıabaqtardy tazartty. Kógaldandyrý jumystaryn júrgizip, gúlder men aǵashtar otyrǵyzyldy.
Aksııa sheńberinde barlyǵy 2,5 myń tonnadan joǵary qaldyqtar jınaldy. Jınaqtalǵan qoqystardyń suryptalyp, 337 tonna áınek, 97 tonna plastık, 67 tonna rezińke, 49 tonna qaǵaz ben 130 tonna metall qaıta óńdeýge berildi.
Aksııa Memleket basshysynyń tapsyrmasy boıynsha ekologııalyq jaǵdaıdy jaqsartý úshin 2019 jyldan beri jyl saıyn ótkizilip keledi.
