Kúlli máskeýlikterdi ónerimen tánti etip, eki aıaǵynan tik turǵyzyp qulashtap qol soqtyrǵan áıgili Kúlásh Baıseıitova KSRO halyq ártisi ataǵyn alǵanda bar-joǵy 24 jasta bolatyn. Biraq ol ataqty izinen qýalap júrip alǵan joq, ataq ony ózi izdep kelip tapty. Mine, ataq osyndaı qasıetimen baǵaly. Prezıdent Qasym-Jomart Toqaevtyń óner adamdaryna «Qazaqstannyń halyq ártisi» ataǵyn qaıtarý týraly ıdeıasyn sahna mamany retinde qup ala otyryp, oıyma aldymen osy mysal tústi. Prezıdent usynysyna qosa, óner men sahna sheberlerine aıryqsha mártebeni qaıtaratyn kezde barmaq basty, kóz qystyǵa salynbaı, halyqqa, ónerge eńbegi sińgen shyn laıyqty tulǵany qapysyz tanyp, marapattasa degen tilegimdi qosqym keledi.
Qazir talantty bolsań, tanylýdyń múmkindigi mol, qoǵam aına sııaqty, dara daryn ıesi eńbeginiń nátıjesimen ózi-aq ekshelip shyǵady. Jaýapty mekemeler ádil baǵasyn berse, bolǵany. О́ner ıesi «halyq ártisi» degen ataqty birden ıelene salmaı, ónerdiń búkil satysynan ótip baryp, sheberliginiń shyńyn, bıik óresin dáleldegende ǵana qol jetkizsin. Fonogrammany qysqartsyn, konsertterin anshlagpen ótkizsin, ol oınaǵan spektaklge taıly-taıaǵy qalmaı el aǵylyp barsyn, halyqaralyq qazylardy tánti etsin, sheteldikterdiń kóńil tórinen oryn alsyn, mine, osyndaı halyqtyń mahabbatyn ıelengen shyn talant halyq ártisi atansa, jarasady emes pe? Sebebi «halyq ártisi» bolý – halyqqa bıik ónerimen adal qyzmet etý. Al bul – qyrýar eńbek, muqalmas minez, ónerge degen jaýapkershilik.
Aıdos BEKTEMIR,
Qazaqstannyń eńbek sińirgen ártisi, Memlekettik syılyqtyń laýreaty
