Qasym-Jomart Toqaevqa ken oryndaryna júrgizilgen tekserý jumystarynyń qorytyndysy týraly esep berildi. Marat Qarabaevtyń aıtýynsha, zańbuzýshylyqtarǵa baılanysty qatty paıdaly qazbalardy ıgerýge berilgen 200-den astam kelisimshart pen lısenzııa qaıtaryp alyndy.
Kezdesý barysynda mınıstr 800-den astam jobadan turatyn jańa ındýstrııalyq ınvestısııalyq jobalar toptamasynyń iske asyrylýy týraly baıandady.
Budan bólek, Memleket basshysyna kólik ınfraqurylymynyń damýy jóninde aqparat berildi. Tıisti tapsyrma boıynsha Úkimet elimizdiń kólik-logıstıkalyq áleýetin damytýdyń 2030 jylǵa deıingi tujyrymdamasyn bekitti. Sondaı-aq tranzıttik áleýetti arttyrý úshin vagon parki tapshylyǵyna qatysty másele sheshilip jatyr. «Stadler», «Alstom» jáne «Wabtec» kompanııalarynyń qatysýymen otandyq zaýyttarda vagon men lokomotıv óndirisi bastalady.
Prezıdenttiń 2029 jylǵa deıingi saılaýaldy baǵdarlamasyn iske asyrý aıasynda halyqaralyq avtomobıl dálizderin damytý, sonyń ishinde respýblıkalyq mańyzy bar 8 myń shaqyrym avtojol salý jáne qaıta jóndeý jumystary júrgizilip jatyr.
Qasym-Jomart Toqaevqa azamattyq avıasııa salasyndaǵy turaqty ósim týraly da baıandaldy. 2022 jyly pandemııaǵa deıingi kórsetkishke qol jetkizildi, ıaǵnı Qazaqstan avıakompanııalary 11 mıllıonǵa jýyq jolaýshy tasymaldady. «Ashyq aspan» rejımi engizildi. Ushý geografııasy keńeıip keledi. 2025 jylǵa deıin Tokıo, Sıngapýr, Shanhaı jáne Nıý-Iork baǵyttaryna reıster ashylady dep josparlanyp otyr.
Qasym-Jomart Toqaev orta bıznesti damytý jáne shıkizat sektoryna, taý-ken ónerkásibi men geologııalyq barlaý salalaryna ınvestısııa tartý jumystaryn kúsheıtýdi tapsyrdy.
Sonymen qatar Prezıdent jol boıyndaǵy, sondaı-aq áleýmettik, ınjenerlik jáne kommýnaldyq ınfraqurylymdardy jańǵyrtýǵa erekshe nazar aýdarýdy, óndiristegi otandyq úlesti arttyrý jumysyn kúsheıtýdi jáne Qala qurylysy kodeksin ázirleýdi jedeldetýdi talap etti.
