Kórme kelýshilerdi ıtalııalyq Qaıta órleýdiń sulýlyǵymen sýsyndatyp, ótkenniń jaýharlaryn kórsetýdi maqsat etedi. Onda jyljymaly kartınalar, kórkem tańdalǵan jaryqtandyrý, úılesimdi mýzykalyq súıemeldeý jáne kartınalardyń birneshe ekranda bir ýaqytta beınelenýi sııaqty kóptegen túrli ınteraktıvti áser qoldanyldy.
Scripta Manent kompanııasynyń bas dırektory Djordjıo Armarolı: «Munda ıtalııalyq Renessans árqaısymyzda buryn-sońdy bolmaǵan sulýlyqty, álemdi qutqaratyn sulýlyqty oıatý úshin usynylǵan», deıdi.
«Kórme bizdi zamanaýı tehnologııanyń arqasynda ótkenge saıahat jasaýǵa múmkindik beredi. Naǵyz ónerde máńgilik nárse bar. Emosııalar onyń berilýi men bastan ótkizýiniń ózgerýine qaramastan árdaıym ónerdiń mańyzdy elementi boldy. Biz tehnologııanyń bergen múmkindigin paıdalandyq. Sol arqyly qazaqstandyq dostarymyzdyń kóbi ımmersıvti saıahat nusqasynda Qaıta órleý dáýiriniń sulýlyǵyna tánti bolyp, olardy jeke kórý úshin elimizge barýdy josparlaıdy degen úmittemiz», dep atap ótti elshi Marko Albertı.
Iá, Italııa – ár kez sýretshilerimen áıgili bolǵan el. Italııalyq avtorlardyń shyǵarmashylyǵy, ıdeıalary búginde álemdik óner men mádenıettiń negizi bolyp sanalatyn klassıka deýge bolady. Jetildirilgen ıtalııalyq tehnologııalar kelýshilerge Renessanstyń tórt sheberi: Leonardo, Rafael, Bottıchellı jáne Mıkelandjelo shyǵarmalarynyń máńgilik sulýlyǵyna qyzyqty saıahat jasaýǵa múmkindik berdi.
Bul bastama Italııa elshiliginiń 2023 jylǵa arnalǵan mádenı nasıhattaý baǵdarlamasynyń bir bóligi sanalady. Kórme 28 sáýirge deıin jalǵasady.
