Jaqyn arada ınflıasııa tómendeıdi degenge halyqtyń da senimi az, onyń ústine memlekettik shyǵystardyń ulǵaıýy, janar-jaǵarmaı jáne turǵyn-úı kommýnaldyq sharýashylyq naryǵynda ýaqyty kelgen reformalar túrindegi proınflıasııalyq faktorlar saqtalyp jáne iske asyryla bastady. Bul da qysymdy kúsheıtedi.
«Inflıasııanyń ornyqty bóligi de baıaýlaýdy kórsetkenimen, proınflıasııalyq ortanyń saqtalýyn dáleldep, áli de joǵary qalpynda qalyp otyr. Qańtar-aqpan aılarynda ınflıasııalyq kútýler tómendegennen keıin qaıtadan jedeldedi. Naýryzda bir jyldan keıin kútiletin ınflıasııa respondentter tarapynan 16,5% deńgeıinde baǵalandy (aqpanda – 14,2%). Inflıasııalyq kútýlerdiń faktorlaryna azyq-túlik baǵasynyń ózgerýi, syrtqy oqıǵalar, teńge baǵamynyń ózgerýi, sondaı-aq jalaqy men zeınetaqynyń ósýi jatady. Syrtqy ınflıasııa baıaýlaǵanyna qaramastan joǵary qalpynda qalyp otyr. Azyq-túliktiń álemdik baǵasy úzdiksiz tómendep keledi, biraq áli de sońǵy bes jyldaǵy ortasha mánderden joǵary qalyptasady», dep málimdedi Ulttyq bank.
Eýropa ortalyq bankteri ınflıasııa áli uzaq ýaqyt boıy joǵary qalpyn saqtap qalady dep kútedi delinedi habarlamada.
«Proınflıasııalyq táýekelder saqtalyp, ishinara júzege asa bastady. Qubylmaly ınflıasııalyq kútýler eldegi proınflıasııalyq ortanyń joǵarylaǵanyn kórsetedi. Retteletin taýarlar men qyzmetter baǵasynyń ósýi saldarynan ınflıasııanyń yqtımal jedeldeý táýekeli saqtalyp, ishinara júzege asa bastady. Sonymen birge respýblıkalyq bıýdjet shyǵystaryn eleýli túrde qaıta qaraý jáne bıýdjettik qaǵıdany paıdalanýdy ýaqytsha toqtatý belgisizdikti týyndatyp, táýekelder balansyn proınflıasııalyq jaǵyna yǵystyrady», dep habarlaıdy.
Osynyń barlyǵyn eskere otyryp Ulttyq bank birinshi jarty jyldyqta bazalyq mólsherlemeni qazirgi mánde saqtap qalýdy oryndy kórgen. Bul elimizdegi ınflıasııalyq úderisterdiń birshama báseńdeı túsýine qoldaý kórsetip, bıýdjet shyǵystarynyń ósýin retteýge jáne ınflıasııalyq kútýlerdiń joǵary deńgeıde turaqtalýyna jol bermeıdi degen senim bar.
Ulttyq bank tóraǵasy Ǵalymjan Pirmatovtyń aıtýynsha, negizgi mindet – ınflıasııanyń turaqty tómendeý traektorııasyna qol jetkizý.
«Ońtústik óńirlerdegi ónimniń shyǵynǵa ushyraýy men úsik saldarynan jemis-jıdek pen kókónis baǵasynyń kóterilýi, sondaı-aq suranystyń joǵary bolýynan kólik qyzmeti qunynyń ósýi ınflıasııanyń tómendeýin tejedi. Bıylǵy naýryzda azyq-túlik ınflıasııasy aıtarlyqtaı baıaýlap, 20,5%-dy quraǵanymen, jalpy ınflıasııaǵa kóptep úles qosýyn jalǵastyryp keledi. Azyq-túlikke jatpaıtyn taýarlar baǵasynyń ósýi 18,1%-ǵa, qyzmetter baǵasynyń ósýi 14,4%-ǵa deıin baıaýlady. Aqpan aıyndaǵy aılyq ınflıasııanyń birshama jedeldeýi baǵalardyń tómendeý trendin buzǵan bolatyn. Alaıda keıin aılyq ınflıasııa 0,9%-ǵa deıin baıaýlady. Bazalyq mólsherleme boıynsha budan keıingi sheshim jańa derekterdiń, sonyń ishinde bizdiń 2023 jylǵy mamyr aıynda boljamdy jańartý kezindegi eskeretin reforma parametrleriniń shyǵýyna táýeldi bolady. Biz janar-jaǵarmaı baǵasynyń ósýinen bolatyn ınflıasııaǵa tikeleı áserge qatysty is-shara qoldanýdy josparlamaımyz. Sonymen qatar monetarlyq saıasat boıynsha sheshim qabyldaý kezinde biz qosymsha áserlerdi, sonyń ishinde baılanysty taýarlar baǵasynyń ózgerýin, ınflıasııalyq kútýlerdi muqııat qadaǵalap, taldaıtyn bolamyz», dedi Ǵ.Pirmatov.
Bazalyq mólsherleme boıynsha kelesi sheshim kezekti boljamdy raýndtyń qorytyndysyna saı belgilenedi jáne 2023 jyly 26 mamyrda Astana qalasynyń ýaqyty boıynsha saǵat 12:00-de jarııalanady.
