Buǵan deıin vedomstvonyń jedel qyzmetkerleriniń nazaryna birneshe ret bopsalaýǵa, qylmystyq teketiresterge, qala men oblys aýmaǵyndaǵy kásipkerlerden qaryzdardy qaıtarýǵa qatysqan top túsken bolatyn.
Qylmystyq toptyń jetekshisi sońǵy kezderi ózin qoǵam belsendisi retinde kórsetip, jastardy tárbıeleý jónindegi patrıottyq qozǵalystyń atyn jamylyp «qaıyrymdylyq qoǵamdyq qoryn» qurǵan.
Ol óziniń qylmystyq bedelin «ádilettilikti jaqtaýshy» – bloger ımıdjine túbegeıli ózgertip, áleýmettik jelilerde belsendi bola bastaǵan.
О́z qoryna erikti jarnalar túrinde qylmystyq «qamqorlyǵy» úshin kásipkerlerden aqsha bopsalap otyrǵan. Buǵan kelispegenderge kúsh qoldanǵan.
«Polısııaǵa toptyń toǵyz múshesi jetkizildi, 20-dan astam tintý júrgizilip, «qańtar» oqıǵasy kezinde oblystyq polısııa departamentinen urlanǵan «Kalashnıkov» avtomaty, eki «Makarov» tapanshasy, myltyq, travmatıkalyq tapansha men basqa da sýyq qarý tárkilendi. Sonymen qatar qylmystyq toptan eki keliden astam esirtki tárkilendi. Qylmystyq topqa qatysýshylarǵa qatysty bopsalaý, qarý men esirtkini zańsyz saqtaǵany úshin 12 qylmystyq is qozǵaldy. Kúdiktiler ýaqytsha ustaý ızolıatoryna qamaldy. Tergeý jalǵasýda», dedi QR IIM uıymdasqan qylmysqa qarsy kúres departamentiniń basqarma bastyǵy Qýandyq Alpys.
