Shekarada mert bolǵandar

UQK Shekara qyzmeti «Zas­tava tarlandary» respýb­lıka­lyq qoǵamdyq birlestiginiń Almaty qalalyq fılıalynyń basshylyǵy, Ulttyq ulannyń ásker jáne lokaldy qaqty­ǵystary ardagerleriniń basyn qosqan is-sharaǵa «Basqa mem­leketter aýmaǵyndaǵy urys qı­myldar ardagerleri men múge­dekteriniń» qoǵamdyq birlestigi uıytqy boldy. Memlekettik orta­lyq mýzeıdiń úshinshi qaba­tynda ashylǵan kórme qonaq­taryn Ulttyq ulannyń Almaty qalasyndaǵy áskerı bólimderi­niń birinen shaqyrylǵan Áskerı orkestr áýezdi áýenmen qarsy aldy. Ári qaraı elimizdiń Án­urany shyrqalyp, shekarashy ardagerlerdiń «Zastava tarlandary» respýblıkalyq qo­ǵam­dyq birlestigi Almaty qala­lyq fılıalynyń tóraǵasy otstav­kadaǵy general-maıor Marat Majı­tov erjúrek ulandar taǵy­lymyn tebirene eske aldy.

– Osydan 28 jyl buryn Pamır taýyndaǵy Pshıhavr shat­qalynda bes saǵatqa sozylǵan qarýly qaqtyǵys kezinde ishki áskerdiń 17 qazaq jaýyngeri er­likpen qaza taýyp, 33-i aýyr ja­ralandy. Al sonyń aldyn­da ǵana, 1994 jyldyń qyrkúıeginde shekarashylar ózderiniń qaı­sar minezdi qarýlastary Rad­jan Batyrhanovtan máńgige aıyry­lyp edi. Ishki áskerdiń on jeti sarbazy da sol kúni Rad­jannyń erligin qaıtalady. Estelik eskirmeıtini sekildi er­lik te eshqashan umytylmaıdy. Keıingi urpaqtyń jadynda máńgi saqtalyp, jastardy patrıottyq rýhqa baýlıdy, – dedi Marat Majıtov.

Sonymen qatar Shekara qyz­metiniń ardageri, otstavkadaǵy general-maıor Toqtasyn Býzý­baevtyń da tájik-aýǵan shekarasy týraly aıtar estelikteri az bolǵan joq. Ǵıbratty is-sha­rany ótkizýge muryndyq bolǵan Ulttyq ulannyń ardageri, zapas­taǵy polkovnık Erlan Alda­nazarov sol bir qaraly kúnniń kýágeri retine oqıǵanyń kartınasyn kópshiliktiń kóz aldyna ákeldi.

– 7 sáýir kúni qaza tapqan 17 sar­baz meniń rotamnyń ja­ýyn­gerleri bolatyn. Bozdaq­tar me­niń kóz aldymda oqqa ush­qan­dyqtan, áli kúnge deıin janyma batady. Olardyń bar kóretin qyzyqtary áli alda edi. Aýyr shaıqastan soń men urystan aman shyqqan jaýyngerlerime erlik jasaǵandaryn aıtyp, rı­za­shylyǵymdy bildirdim. Elge qaıtqysy keletinderge ruqsat beriletinin jetkizdim. Sonda me­­niń rotamdaǵy jaýyngerler bir aýyzdan qaza bolǵan qarýlas joldastarynyń kegin qaıtarmaı, ózderiniń elge oralmaıtynda­­ryn aıtty, – degen E.Aldanazarov búgin bizdiń aramyzda sol kúni boılaryndaǵy kúshti rýh­tyń ushqynyn kórsetken sarbaz­dar­dyń qatarynda bolǵan úsh jaýyngeriniń otyrǵanyn tilge tıek etti.

Olar – Elaman Úmbetov, Ju­mahan Shashýbaev, Janat Nesi­povter eken. Koman­dırleriniń ózderine kórsetken lebizine bú­ginde el aǵasyna aınalǵan sarbazdar qoldaryn keýdelerine qoıyp, rızashylyq tanyt­ty. Osylaısha, óz sarbazdary­nyń er­ligine erekshe toqtalǵan Erlan Jarylqasynuly ózi bas­qara­tyn «Basqa memleketter aýma­ǵyn­daǵy urys qımyldary ar­dager­leri men múgedekteriniń» qo­ǵam­dyq birlestiginiń osyndaı patrıottyq rýhtaǵy is-sharalar­dy úzdiksiz jalǵastyra beretinin jetkizdi.

Sonymen qatar taǵzym is-sharasyn kópshilikke tanymal Shekara qyzmetiniń ónerdegi ókilderi Zámzágúl Kenjebaeva men Baqtııar Ermahanov pa­­t­r­ıot­tyq rýhtaǵy ánderimen ár­ledi. Zámzágúl óziniń Radjan Batyrhanovqa arnaǵan avtorlyq ánin oryndasa, Baqtııardyń «Go­rıachıe tochkıı» atty týyndysy jınalǵandardyń júreginen oryn aldy.

On jeti sarbazdy ulyqtaýǵa arnalǵan is-sharanyń sońy qonaq­tardyń kórmeni tamashalaýyna ulasty. Munda tájik-aýǵan she­karasynda ótken urystyń jádigerine aınalǵan zattar qo­ıylyp, mýzeı qabyrǵasyna otty kúnderden maǵlumat beretin kórneki quraldar ilingen. Áınek astyndaǵy árbir zat ótken kúnniń belgisindeı bolyp, kózge ottaı basylady...

ALMATY