Memleket basshysy qazaqstandyq tennısshilerdiń jetistigi óskeleń urpaq arasynda osy sport túriniń tanymaldylyǵyn arttyrýǵa septigin tıgizetinin atap ótti.
Elena Rybakına jeńis tuǵyrynan kóringen sátterinde qoldaý bildirgeni jáne júrekjardy quttyqtaýlaryn joldaǵany úshin Prezıdentke alǵys aıtty. Dańqty tennısshi aldaǵy ýaqytta da bedeldi halyqaralyq jarystarda sátti óner kórsetýge bar kúsh-jigerin jumsaıtynyn jetkizdi.
Memleket basshysy Qasym-Jomart Toqaev qazirgi tańda elimizde 30 myńnan asa adam tennıspen shuǵyldanatynyna toqtaldy. Onyń 10 myńnan astamy – 10 jasqa deıingi balalar. Osy sport túrine buqaralyq sıpat berý maqsatynda elimizdiń 17 aımaǵynda tennıs korttary salyndy. Sondaı-aq Baby tennis, «10 jasqa deıingi tennıs» sekildi jobalar tabysty júzege asyrylyp jatyr.
14-15 sáýir kúnderi Astanada alǵash ret Bıllı Djın Kıng kýbogynyń irikteý matchy ótedi. Tennısten Qazaqstannyń áıelder quramasy Polsha komandasyna qarsy oınaıdy. Bul kezdesýdiń jeńimpazy álem chempıonatyna joldama alady.
Memleket basshysy halyqaralyq deńgeıdegi mundaı is-sharalardy uıymdastyrý elimizdegi tennıstiń damý deńgeıin arttyrýǵa tyń serpin beretinin aıtty. Sondaı-aq Parıjde ótetin jazǵy Olımpıada oıyndaryna lısenzııa utyp alǵan otandyq tennısshilerge sáttilik tiledi.
