Bul úshin olar aldymen jeke kásipker (JK) retinde tirkelip, tıisti qujattardy onlaın-platforma arqyly usynýy kerek. Sosyn operatorlar aı saıyn olardan jarty jyldyq kiristiń 1 paıyzyn alyp otyrady. Eger ol burynnan jumys istep turǵan JK bolsa, onda salyq rejimin ózgertýi kerek.
«Jeke kásipkerdiń sheshimimen operator qarajatty ustap qalý boıynsha mindettemeni oryndaý bóliginde salyq agenti bolyp tanylady. Qanatqaqty jobaǵa qatysýshylar úshin mindetti zeınetaqy jarnalary men áleýmettik aýdarymdardy salý obektisi osyndaı jeke kásipkerdiń eń tómengi bir jalaqy mólsherindegi tabysy bolyp sanalady. Mindetti áleýmettik medısınalyq saqtandyrýǵa jarnalar salý obektisi eń tómengi jalaqynyń 1,4 eselengen mólsherindegi tabys bolyp esepteledi», dep habarlaıdy mınıstrlik.
Bul jańalyqqa qatysty kýrerlerdiń pikiri de ár alýan. Máselen, tapsyrys jetkizýshi bolyp jumys isteıtin Sergeı Belov bul bastamamen kelisedi.
«Mundaı salyq qaltaǵa aýyr tımeıdi. Ekinshiden, biz qorǵalatyn bolamyz. Kýrer bir aıda 400 myń teńgeni erkin tabady», deıdi ol «Astana» arnasyna bergen suhbatynda.
Al «Atameken Business» tilshisine pikir bildirgen jetkizýshiler men taksı júrgizýshileri mundaı jańashyldyqqa daıyn emes ekendikterin aıtqan.
«Onsyz da tabysymyz bóliske túsip jatyr. Myń teńge tapsam, sonyń 270 teńgesin «Iаndeks» alady. Endi memleket aqsha ustap qalsa, onda bir sheshimder qabyldaýy qajet shyǵar. Park komıssııasyn alyp tastaý nemese parkterdi múlde joıý degen sııaqty. Onyń ústine Áleýmettik kodeks qabyldandy. Endi ne bolmaq? Sonda tapqan myń teńgeniń 600 teńgesi ǵana maǵan tıesili bolmaq», deıdi kýrer Arman Alshynbaev.
Eńbek jáne halyqty áleýmettik qorǵaý mınıstrliginiń málimeti boıynsha qazir elimizde 500 myńnan astam kýrer bar.
