«Qarýly Kúshterimiz – memlekettigimizdiń myzǵymas tiregi. Týǵan eldiń táýelsizdigin jáne beıbit ómirin qorǵaý – qasıetti paryz. Týǵan jerdiń aýmaqtyq tutastyǵyn saqtaý – qasterli borysh. Batyr babalarymyz ǵasyrlar boıy jeriniń shetin jaýǵa bastyrmaı, bizge mıras etti. Osy uly murany kózdiń qarashyǵyndaı saqtaý – basty mindetimiz. Birtutas ári qýatty memleketti urpaqqa tabystaý – negizgi maqsatymyz. El ishi – tynysh, qoǵam – turaqty bolsa, jasampaz ári órkenıetti memleketke aınalamyz. Iаǵnı, damyǵan el bolamyz desek, eń aldymen, beıbitshilik jáne tynyshtyq kerek», dedi Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev.
Memleket basshysynyń aıtýynsha, Qazaqstannyń Qarýly Kúshteri osy qasterli qundylyqtardy qorǵaýǵa tıis. Dese de, sońǵy ýaqytta álemde jappaı qarýlaný beleń alyp barady. Bul rette Qazaqstan armııasy el egemendigin saqtaýǵa árdaıym daıyn bolýy tıis.
«Barlyq másele halyqaralyq quqyq aıasynda Birikken Ulttar Uıymynyń Jarǵysyna sáıkes sheshilýge tıis dep sanaımyz. Alaıda, zaman kúnde qubylyp jatyr. Memleketter óz múddesin qorǵaý úshin jıi kúsh qoldanatyn boldy. Álemde jappaı qarýlaný beleń aldy. «Jaý joq deme, jar astynda» degen sóz bar. Qazirgi kúrdeli kezeńde armııanyń róli kúsheıe tústi. Armııa egemendigimizdi qorǵaýǵa árdaıym daıyn bolý qajet. Onyń kásibı daıyndyǵy, zamanaýı qarý-jaraqpen, ozyq tehnologııamen jabdyqtalýy basty faktorǵa aınaldy», dep atam ótti Prezıdent.
Otyrys barysynda Qasym-Jomart Toqaev áskerdiń biliktiligi men utqyrlyǵy urys nátıjesine tikeleı áser etetinin qadap aıtty.
«Armııa osy talapqa saı bolsa, óz mindetin oıdaǵydaı atqarady. Túrli qaýip-qaterge toıtarys bere alady», dedi Memleket basshysy.
