Aǵylshyn tilindegi alǵashqy spektakl

Elimizdiń bas qalasy – Astana kúni mere­kesi qarsańynda L.N. Gýmılev atyn­daǵy Eýrazııa ulttyq ýnıversıtetiniń «Shańyraq» stýdenttik teatry ujymy belgili dramatýrg, Qazaqstannyń eńbek sińir­gen qaıratkeri Joltaı Álmashuly Jumattyń «Muńmen alysqan adam» atty spektaklin aǵylshyn tilinde sahnalady. Atalǵan spektakl jyl basynan beri Qostanaı, Semeı teatrlarynda qoıylyp, kórermenderdiń ystyq yqylasyna bólengen bolatyn. Onyń ústine Qostanaı oblystyq qazaq drama teatry sol qoıylymdy sáýir aıynda elordamyzǵa gastroldik saparmen alyp kelip, talǵampaz qaýymnyń nazaryna usynǵan edi. Endi, mine, sol spektakl ýnıversıtettiń ónerpaz jastarynyń ynta-jigerimen aǵylshyn tilinde sahnaǵa shyǵarylýy úlken mádenı jańalyq boldy. Bul avtordyń mereıi ǵana emes, búkil qazaq dramatýrgııasy, qazaq óneri úshin de úlken jetistik dese bolady. Bul táýelsizdiktiń arqasynda qol jetken elimizdiń rýhanı tabystarynyń biri, Elbasymyzdyń «úsh tuǵyrly til» ıdeıasynyń iske asqan bir sáti. Biz shetel klassıkteriniń dramalaryn ana tilimizge kóptep aýdaryp, jıi-jıi sahnalap kelemiz, al endi tól týyndymyzdy shetel tilderine aýdaryp kórsetý, kórkemdik kókjıegimizdi keńitetini sózsiz. Bul rette kásibı tea­tr emes, jastarymyzdyń ózi talpynyp, dra­matýrgtiń osy shyǵarmasyn tańdap alyp, ony aǵylshyn tilinde sátti qoıyp shyǵýy qýana qostaýdy qajet etedi. Týyndynyń taǵy bir ereksheligi, onyń taqyrybynyń ózi shetelde turyp qalǵan qandastarymyzdyń taǵdyrymen tyǵyz baılanysty. Qoıylymǵa kelgen kórermender qoıý­shy rejısser Jambyl Tilepovke, kórkem­dik jetekshi Esbol Tókeevke, jas talap­ker­ler Dáýir Nurbolatov, Amanbek Maǵzum­han, Anar Izet, Dana Janabekqyzy, Esbol Tó­keev, Aı­nur Álibekqyzy, Aldııar Japar­hanov­tar­dyń ónerlerine óz rıza­shy­lyqtaryn bildirdi. «Biz bul qoıylymdy aldaǵy ýaqytta Astanadaǵy barsha sheteldik elshilik ókilderine kórsetýdi qalaımyz, ony alys-jaqyn memleketterge uıalmaı alyp barýǵa bolatynyn da baıqadyq», – deıdi Syrtqy ister mınıstrligi Halyqaralyq aqparat komıtetiniń tóraǵasy R.Vasılenko. Aınur NAIMANBAI, mádenıettanýshy.