Halyqaralyq bilim saıysy fızıka páninen elordada ótedi

Táýelsizdigimizdiń arqasynda Qazaq eli barlyq saladan ózin jan-jaqty tanytýda. Sońǵy jyldary tórtkúl dúnıeniń talantty jastary ár alýan sharalar aıasynda Otanymyzdyń ońtaıly jumystaryna kýá bolyp keledi. Sonyń biregeıi halyqaralyq deńgeıde ótetin pán olımpıadalary der edik. Osydan tórt jyl buryn Astanada matematıka páninen álemniń 98 elinen kelgen 500 oqýshy baq synaǵan bolatyn. Sol bilim báıgesinde elimizdiń baýlyp qosqan daryndy ul men qyzdary Sıngapýr, Gonkong, Qytaı, Japonııadan keıingi 5-shi orynǵa taban tirep, memleket bedelin bir bıiktetip tastaǵan edi. Sol úrdis bıyl da jalǵasyn taýyp otyr. Aǵymdaǵy jyldyń 13-15 shildesi aralyǵynda Astana qalasyndaǵy Nazarbaev Ýnıversıtetinde Bi­lim jáne ǵylym mınıstrligi «Daryn» respýblıkalyq ǵylymı-prak­tı­kalyq ortalyǵynyń uıytqy bolýy­men fızıka páninen oqýshy­lardyń 45-shi halyqaralyq olım­pıa­dasy ótedi. Oǵan tórtkúl dúnıe­niń 88 memleketinen 700 úmit­ker qatysady. Mundaı olımpıadanyń bas­ty maqsaty, daryndy balalardy anyqtap, qoldaý kórsetý, bola­shaǵyna dańǵyl jol ashý. Aqyl ıeleriniń oı jemisin tanyp-bilip otyrý. Jalpy, álemdi ózgertetin ǵalamat aqyl ıeleri. Olardy der kezinde taýyp, bulaq kózin ashý, týra jolǵa salý, azamattyq bıikke kóterý al­dyńǵy tolqynnyń min­deti. Sol mindet údesinen shyǵý maqsatynda uıym­das­tyrylǵan bul halyq­aralyq olımpıadadan alar taǵylym da, úırener úlgi de az bolmasa kerek. Elimizdiń bedelin kóteretin bul bilim jarysy jaıly «Daryn» ortalyǵynyń dırektory Sholpan Qırabaevany áńgimege tartqanymyzda ol: «Álemdik deńgeıdegi úlken sharanyń bizdiń elimizde ótýin men memleketimizdiń, Prezıdentimizdiń abyroıymen sabaqtastyramyn. Sebebi, mundaı olımpıada kez kelgen elde bola bermeıdi. Onyń ústine bizdiń jas daryndarymyz dúnıejúzilik jarystarda júlde alyp, jurttyń nazaryn aýdaryp keledi. Fızıka páninen ótetin 45-shi halyqaralyq olımpıada jarysyna 5 oqýshyny baptap, qosyp otyrmyz. Olar : Ámir Birálın, Danat Isa, Dinmuhammed Nurbek, Nurıslam Tursynbek, Dáýlet Qurmantaev. Bári de halyqaralyq, respýblıkalyq jarystarǵa qatysyp, altynnan alqa taǵyp, júzden júırik shyqqandar. Bul olımpıadanyń bas demeýshisi – álemdik Exxon Mobile kompanııa­sy ekenin aıta ketsem deımin. Jas urpaqqa ylǵı demeýshilik kórsetip kele jatqan bul kompanııa 2010 jyly ótken matematıkalyq olımpıadaǵa da, halyqaralyq Jáýtikov atyndaǵy bilim jarysyna da, jaratylystaný-matematıkalyq pánderden Prezıdenttik bilim báıgesine de bas demeýshi bolyp júr. Olımpıada 14 shilde kúni Astanadaǵy Beıbitshilik jáne kelisim saraıynda ashylady» dedi. Súleımen MÁMET, «Egemen Qazaqstan».