Batys shekara kúzetinde

Keshe Qorǵanys mınıstri Serik Ahmetov «Batys» óńirlik qolbasshylyǵynyń Aqtaý garnızonynda jumys saparymen boldy. Sapar sheńberinde Qorǵanys mınıstri avıasııalyq bazanyń jýyrda ǵana paıdalanýǵa berilgen jańa keshendi ǵımaratynda boldy. Ǵımarattyń jalpy aýmaǵy 3 myń sharshy metrdi quraıdy. Mınıstr áskerı garnızonnyń qazirgi qyzmeti jáne jaǵdaıymen, sondaı-aq, onyń damý perspektıvalarymen tanysty. Aqtaý garnızonyna sapary barysynda S. Ahmetov teńiz jaıaý áskeri quramasynda boldy. «Teńiz jaıaý áskeri quramasy – Qazaqstan Qarýly Kúshterindegi birden-bir áskerı bólimshe. Búginde bul jaýyngerlik bólim batys strategııalyq baǵyttaǵy tapsyrmalardy oryndaıdy, oblystyń qaýipsizdigin qamtamasyz etedi. Atalǵan qurama qarý-jaraq pen áskerı tehnıkanyń barlyq túrlerimen jaraqtanǵan jáne qoıylǵan tapsyrmalardy oryndaýǵa daıyn», dedi «Batys» óńirlik qolbasshylyǵy áskerleriniń qolbasshysy, polkovnık Murat Nuǵymanov. S.Ahmetov áskerı qyzmet­shi­lerdiń jaýyngerlik daıarlyǵyn uıymdastyrý, qarý-jaraq pen áskerı tehnıkanyń tehnıkalyq áleýeti, memlekettik qorǵanys tapsyrysy sheńberinde alynǵan jańa úlgidegi qarý-jaraq pen áskerı tehnıkany qabyldaý men olardy paıdalaný boıynsha qolbasshylyqtyń baıandamalaryn tyńdady. Aımaqqa sapary barysynda mınıstr jeke quramnyń áleýmettik jaǵdaıyna, Qor­ǵanys mınıstrliginiń áskerı qyz­met­shiler úshin turǵyn úı qury­lysyn júrgizý jónindegi baǵdar­lamasynyń júzege asyrylýy, turmys pen qyzmet jaǵdaıyn odan ári jaqsartý máselelerine aı­ryqsha kóńil bóldi. Aqtaý garnızonyndaǵy nysandar men bólimshelerdi qaraý barysynda mınıstr áskerı-teńiz bazasynyń oqý ortalyǵymen, oqý-jattyǵý stan­sasymen tanysty. «Batys» óńirlik qolbasshylyǵy 2003 jyly qurylǵan. О́ńirlik qolbasshylyqtyń negizgi tapsyrmalary memlekettik shekaraǵa qol suǵylmaýshylyqty, aýmaqtyq tu­tastyqty, egemendik pen Kaspıı teńi­ziniń qazaqstandyq sektoryn­da elimizdiń ekonomıkalyq múd­delerin qorǵaý bolyp tabylady. «Egemen-aqparat».