Qonys toıy

Atyraýda 54 otbasyna jańa páter berildi Astana kúni qarsańynda mu­naıly óńirde 54 páterlik jańa tur­ǵyn úı paıdalanýǵa berildi. «Bul kóp páterli úı «Qoljetimdi bas­pana-2020» memlekettik baǵ­darlamasy aıasynda boı kóterdi. Jańa turǵyn úı az qamtylǵan otba­sylarǵa, balalar úıi men ınternat túlekterine, memlekettik qyz­metkerlerge berilip otyr», dep málim etti Atyraý qalasynyń ákimi Nurlybek Ojaev. Naqtylaı aıtqanda, jańa pá­terge ıe bolǵandardyń deni uzaq jyl kezekte turǵandar eken. Máselen, jas otaǵasy Sergeı Ýlıa­novtyń jary Marına Ijers­kaıa balalar úıinde ata-ana qamqor­lyǵynsyz tár­bıelen­genderdiń biri bolǵanmen, 2006 jyldan beri páter alý kezeginde turypty. Budan by­laı jas otbasy eki bólmeli páter­diń jylýyn sezinetin bolady. Sol sekildi bıýdjettik sala qyz­metkeri Qanzıba Qaıyrdy da baspanaly bolý baqytyn uzaq kút­ken jandardyń qatarynda deýge bolady. Ol 1999 jyly Aty­raý­ǵa Qyzylqoǵa aýdanynan kóship kelgennen beri úsh ulynyń otbasylarymen jataqhananyń aıadaı bólmesin panalap kelipti. Basybaıly baspanany zaryǵa kútken úlken áýlet endi úsh bólmeli páterdi ıelendi. – Jyl aıaǵyna deıin Atyraýda taǵy da bir myńnan asa jaldamaly páter beriletini josparlanyp otyr, – dep málimdedi Nurlybek Ojaev. Joldasbek ShО́PEǴUL, «Egemen Qazaqstan». Sýretti túsirgen  Rahym QOILYBAEV. Atyraý oblysy.