Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Andreı Lýkın alǵysózinde Memleket basshysy Qasym-Jomart Toqaev adam quqyqtaryn qorǵaýdy kúsheıtýge erekshe kóńil bólip otyrǵanyn atap ótti.
«Qylmystyq prosestiń qýǵyn-súrginin tómendetýge jáne onyń básekege qabilettiligin arttyrýǵa baǵyttalǵan quqyq qorǵaý qyzmetin jańǵyrtý – advokattyq qyzmettiń sapasyn jáne tutastaı alǵanda azamattarǵa zańgerlik kómek kórsetý júıesin jaqsartýdy talap etedi. Bilikti zańgerlik kómek qazirgi azamattyq qoǵamnyń mańyzdy quramdas bólikteriniń biri, oǵan bilikti zańgerlerdiń qyzmeti dálel. Bul quqyqty júzege asyrý tetikterin áli de jetildirý qajet», dedi senator Lýkın.
О́z kezeginde Ádilet mınıstriniń orynbasary Bekbolat Moldabekov parlamentshilerge azamattardyń quqyqtaryn qorǵaý ınstıtýtynyń damýy týraly aıtyp berdi. Atap aıtqanda, mınıstrdiń orynbasary qaǵaz aınalymynyń deńgeıin aıtarlyqtaı tómendetýge jáne azamattardyń zań qyzmetterin alýyn jeńildetýge baǵyttalǵan sıfrlyq qosymshalardyń jumysy týraly habardar etti.
Jıyn barysynda aýyl-aımaqtaǵy zańgerlerdiń jetispeýshiligi de sóz boldy. Máselen, Ishki ister mınıstrliginiń aqparatyna sáıkes, elimizdiń keıbir óńirlerinde advokattardyń jetispeýshiligi aıtarlyqtaı baıqalady. Máselen, Qyzylorda oblysy boıynsha Jalaǵash aýdanynda nebári 2 advokat tirkelgen, bul tergeý áreketterin júrgizýdi qıyndatyp otyr.
Dóńgelek ústel jumysyna Parlamentarızm ınstıtýtynyń, Respýblıkalyq advokattar alqalarynyń ókilderi men zań konsýltanttary da qatysyp, baıandamalar jasady.
Otyrys qorytyndysy boıynsha senatorlar usynymdar ázirledi, olar múddeli memlekettik organdarǵa joldanady.
