Atalmysh dodadaǵa Qazaqstan atynan Almatydaǵy High Tech Academy mektebi men Qaraǵandydaǵy N.Nurmaqov atyndaǵy mamandandyrylǵan mektep-ınternatynyń oqýshylary qatysty. Úzdik ınnovasııalyq joba nomınasııasynda High Tech Academy atynan barǵan Arturli komandasy jeńiske jetti. Olardyń ınnovasııalyq jobalary energııany úı sharýashylyǵynda saqtaý jáne qoldanýdyń revolıýsııalyq tásiline negizdelgen.
«Biz ekologııalyq zııandy ári asa qymbat akkýmýlıatorly polımerli batareıalardy paıdalanbaýǵa tyrystyq. Onyń ornyna revolıýsııalyq sheshim usynyp otyrmyz, bul gravıtasııalyq batareıalar. Mundaǵy oı – kúndiz óndirilgen energııadan qor jınaqtap, tún mezgilinde paıdalaný. Joba úshin tereńdigi 100 metr bolatyn shahta ázirlenip, árqaısysy 300 tonna bolatyn jeti júk iske qosylady. Kóterilgen júkter qajet bolǵan kezde bosatylatyn «energetıkalyq qor» retinde qarastyrylady. Jalpy bizdiń júıemiz shamamen 75 úıdi táýliktik normamen qamtamasyz ete alady, bul úı sharýashylyqtaryna energııamen qamtylýda tolyqtaı derbes bolýǵa múmkindik beredi», deıdi óz jobalaryn tanystyrǵan komanda músheleri.
USTEM Robotics qorynyń jetekshisi Asylbek Murzahmetovtyń aıtýynsha, bizdiń oqýshylarymyz elimizdiń namysyn abyroımen qorǵap qana qoımaı, álemdik qaýymdastyqqa halqymyzdyń baı tarıhy men mádenıetin de laıyqty tanystyra aldy.
«Balalar saıysqa birneshe aı boıy óte muqııat daıyndaldy. Olardyń kópshiligi aǵylshyn tilin jaqsy meńgergen jáne ulttyq aspaptarda oınaıdy. Onyń ústine olardyń ǵylymı zertteýleri otandyq ýnıversıtetter professorlarynyń saraptaýynan ótken. Baıqaý kezinde Qazaqstannyń ulttyq buryshyn tamashalaýshylardyń tarapynan kóptegen jaǵymdy pikirler estidik», dep atap ótti Asylbek Murzahmetov.
Eske sala keteıik, mektep oqýshylary aqpan aıynyń sońynda Qazaqstan Respýblıkasy Oqý-aǵartý mınıstrliginiń qoldaýymen ótken FIRST Central Asia Ortalyq Azııa oıyndarynda Western Edge Open chempıonatyna qatysýǵa lısenzııa alǵan bolatyn.
