Is-sharanyń ashylý saltanatyna Astana qalasynyń Dene shynyqtyrý jáne sport basqarmasynyń basshysy Samat Jylqybaev, Sportty damytý dıreksııasy dırektorynyń orynbasary, jazǵy Spartakıadanyń bas tóreshisi Azamat Imashev jáne qalalyq kórkem gımnastıka federasııasynyń prezıdenti Saıranbek Ábilhaıyr qatysty.
Kópshilikti kórkem gımnastıkadan QR-nyń VI jazǵy Spartakıadanyń bastalýymen qalalyq sport basqarmasynyń basshysy Samat Jylqybaev quttyqtap, saltanatty túrde ashty.
«Osyndaı is-sharanyń keremet sport kesheninde ótip jatqany kóńil qýantady. Jazǵy Spartakıada arqyly sizderge aldaǵy ýaqytta Azııa, álem chempıonattarynda óner kórsetýge múmkindik alasyzdar degen senimdemin. Qazirgi tańda gımnastıka sport túri elimizde qarqyndy damyp, sportshylarymyz da kóptegen jetistikterimen el sportynyń tarıhynda esimderin qaldyryp úlgerdi. Sportshylardyń jarqyn jeńisi – qashanda el bedeli. Barlyqtaryńyzǵa sáttilik!», dedi qalalyq sport basqarmasynyń basshysy Samat Jylqybaev.
Araǵa 4 jyl salyp, keshendi jarysqa bul joly jekeleı synda elimizdiń ár óńirinen 54 gımnast keldi. Al toptyq jattyǵýda 12 komanda baq synap jatyr. Bul qatarda Eljan Tanıeva, Erıka Jaılaýova, Mılana Parfılova syndy halyqaralyq básekelerde el namysyn qorǵap júrgen sportshylar bar.
Sondaı-aq spartakıadanyń ashylý saltanaty barysynda QR halyqaralyq dárejedegi sport sheberi ataǵymen Jasmın Júnisbaeva, Aıym Meırajova, Aısulý Mýrzagalıeva, Mılana Parfılova, Dına Myrzabaeva, Anel Gúlmaganbetova, Aızere Keńes, Dıana Meńdibaeva, Krıstına Chepýlskaıa marapattaldy.
Aıtýly básekeniń alǵashqy kúni lenta jáne urshyqpen óner kórsetken júldegerler búgin keshke anyqtalady.
Aıta keteıik, jas gımnasshylar saıysy mamyrdyń 19-na deıin ótedi.
