Ulttyq mýzeıdegi biregeı kórme

Astanadaǵy Ulttyq mýzeıde «Ortalyq Azııa men Kavkazdaǵy dástúrli toqyma óneri – Uly Jibek jolynyń murasy» atty kórme ashyldy. Oǵan  Reseıdiń etnografııalyq mýzeıindegi (Sankt-Peterbýrg) qundylyqtar toptamasy qoıylǵan.  400-den astam jádiger arasynda: qural-saımandar men stanoktar, kıim-keshekter, úı buıymdary, kólik jabdyqtary, mata úlgileri, kilemder men kesteler, úılený toıyna, ıslam dinine qatysty zattar, ózge de dúnıeler bar. Biregeı kórmeniń ashylý sátinde Qazaqstan Respýblıkasynyń Ulttyq mýzeıiniń dırektory Darhan Myńbaı: «Uly Jibek joly taqy­rybynyń máni zor, onyń mańyzdy tarıhı róli bizdiń zamanymyz úshin de ótkinshi nárse emes. Búgingi tańda jańarǵan Uly Jibek joly tirshiliktiń barlyq salasynda, onyń ishinde mádenıet salasy boıynsha da halyqaralyq qatynastardyń damýyna myqty serpin berip otyr. Bizdiń memleketterimizdiń arasynda berik dostyq erteden-aq or­naǵan. Búgingi áriptesterimiz uıym­­dastyryp otyrǵan osy kór­me jaqsy qarym-qatynastyń, ashyq­­tyqtyń, ortaq maqsat pen min­detterdiń mańyzdylyǵyn túsi­nýde yntymaqtastyqtyń bar ekenin taǵy da dáleldep otyr. Reseı etno­grafııalyq murajaıy – Reseıdiń iri mýzeıleriniń qataryna jatady, onyń qorynda Qazaqstan tarıhyna qatysty dúnıeler barshylyq. Bul óz kezeginde qurmet pen senim týdyrady. Bizdiń uzaq merzimdi qarym-qatynasymyzdyń bastaýy bolǵaly turǵan kórme Ulttyq mýzeıge kelýshilerdiń qyzyǵýshylyǵyn týdyratynyna senimdimin», dedi. Al Reseı etnografııalyq mýzeıiniń dırektory Vladımır Grýsman: «Biz osy kórmeniń Qazaq eliniń jańa mýzeıin erekshe qurmettiń belgisi dep bilemiz. Eýrazııa qurlyǵynda ornalasqan halyqtardyń bir-birimen osyndaı úzdiksiz qarym-qatynasta bolýyn qoldaımyn. Bul arqyly adamzattyń basty maq­sat­tarynyń bir ekenin jáne árbir ult­tyń mádenıetiniń ózindik qun­dylyǵy baryn kórsetemiz. Kórme Ortalyq Azııa men Kavkaz­dyń máde­nı murasyna qalyń kópshiliktiń qyzyǵýshylyǵyn arttyrady, dep senemiz. San túrli jádigerler Ortalyq Azııa men Kavkaz turǵyndarynyń kúnde­likti turmys-tirshiligin kóz aldy­myzǵa elestetedi. Biz Qazaq­stan Res­pýblıkasynyń Ult­tyq mýzeıi­men áriptes bolyp, baı­lanys ornata berýge ázirmiz. О́ıtkeni, bul kórme – eki taraptyń da joǵary deńgeıdegi mamandary eńbekteriniń jemisi» dep sóz aıaǵyn túıdi. Osy arada Qazaqstan Respýblı­kasynyń Ulttyq mýzeıi men Reseı etnografııalyq mýzeıi basshylary áriptestik týraly memorandýmǵa qol qoıǵanyn eske sala ketsek deımiz. Taǵy bir nárse «Ortalyq Azııa men Kavkazdaǵy dástúrli toqyma óneri – Uly Jibek joly­nyń murasy» atty bul kórme – Qazaqstan men Reseıdiń eki iri mýzeıiniń arasyndaǵy alǵashqy birlesken joba bolyp sanalady. Kórme osy jyldyń 1 qyrkúıe­gine deıin jalǵasyn tabady. Júz jyldyq tarıhy bar Reseı etno­grafııalyq mýzeıi Eýropadaǵy iri etnografııalyq mýzeılerdiń birinen sanalady. Onyń qoryna Eýrazııadaǵy 157 halyqtyń mádenı murasy shoǵyrlanǵan. Mýzeı 1991 jyly Reseı Federasııasy halyqtary mádenı murasynyń asa qundy nysany retinde memlekettiń qorǵaýyna alynǵan. Súleımen MÁMET, «Egemen Qazaqstan».