– Tóraǵa Sı Szınpınmen óte mazmundy kelissózder júrgizdik. Sondaı-aq birlesken málimdeme jasaldy, birqatar mańyzdy kelisimderge qol qoıyldy. Shyn máninde, bul sapar qazaq-qytaı yqpaldastyǵynyń «30 jyldyq altyn dáýirin» bastady deýge bolady. Árıne, bul sapardyń mán-maǵynasy erekshe. Búgin – Qazaqstan men Qytaı yntymaqtastyǵy úshin taǵy da bir asa mańyzdy ári tarıhı kún. Biz Sıan qalasynda Qazaqstannyń Bas konsýldyǵyn ashqaly turmyz. Búginde Sıan – «Bir beldeý – bir jol» ekonomıkalyq beldeýiniń mańyzdy beketi. Shensı ólkesi jáne Sıan qalasy Qazaqstanmen tyǵyz baılanys ornatqan. Soltústik Qazaqstan oblysymen jáne Shymkent qalasymen baýyrlastyq qatynas týraly kelisimge qol qoıyldy. Bul sharalar eki el arasyndaǵy barys-kelisti jandandyra túseri sózsiz. Bas konsýldyq osy yntymaqtastyqty odan ári damytýǵa úles qosady dep senemin, – dedi Qasym-Jomart Toqaev.
Memleket basshysy Sıanda Bas konsýldyq ashý týraly tıisti jarlyqqa 2022 jyly 5 qarashada qol qoıǵan bolatyn. Konsýldyq ǵımaratynda dıplomattarmen qatar Qazaqstannyń ekonomıkalyq múddesin ilgeriletý úshin ulttyq kompanııalardyń ókildikteri de ornalastyrylady.
Bas konsýldyqtyń ashylý saltanatyna Memlekettik keńes múshesi, QHR syrtqy ister mınıstri Sın Gan qatysyp, Qytaı úkimetiniń atynan quttyqtaýyn jetkizdi. Qytaılyq dıplomattyń aıtýynsha, Sıan qalasynda Qazaqstannyń Bas konsýldyǵynyń ashylýy eki eldiń jan-jaqty strategııalyq yntymaqtastyǵy jańa deńgeıge kóterilgenin bildiredi.
Qazaqstan – Qytaıdyń Shensı provınsııasynda óziniń dıplomatııalyq ókildigin ashyp otyrǵan Ortalyq Azııadaǵy jalǵyz el.
