Eldegi eń úlken jataqhana esik ashty

Bilim jáne ǵylym mınıstri Aslan Sárinjipovtyń qatysýymen Qara­ǵandy memlekettik tehnıkalyq ýnı­versıteti stýdentterine arnap sa­lynǵan «Armandastar ordasy» jataqhanasy ashyldy. Prezıdenttik «Stýdentter turǵyn úıi» baǵdarlamasy sheńberinde qysqa merzimde boı kóterip, paıdalanýǵa berilgen 822 oryndyq bul qonys turǵyndaryna qolaıly turmystyq jaǵdaıda alańsyz oqýǵa barlyq múmkindik jasalǵan. 2-3 adamdyq bólmelerge osy zamanǵy jıhazdar qoıylǵan. Symsyz ǵalamtor, máslıhat zaly, eń jańa medısınalyq jabdyqtarmen jaraqtalǵan densaýlyq pýnkti, ashana, jastar ıgiligine qyzmet etedi. Dál janyndaǵy «Jastar álemi» Mádenıet saraıy men sport kesheni bos ýaqyttaryn paıdaly ótkizýine yńǵaıly. – Elbasynyń ózi basty nazarda ustap otyrǵan memleketimizdiń biz­derge arnalǵan aıaly qamqorlyǵyna rızalyǵymyz sheksiz. Soǵan oraı jaq­sy oqyp, úlgili tárbıe alyp, súıikti Qazaqstanymyzdyń ósip-órkendeýine laıyqty úles qosýǵa qulshynysymyz joǵary, – dedi qonystastary atynan sóz alǵan 3-kýrs stýdenti Rýstam Chýjıkov. Mınıstr atalǵan oqý ornynda bolý kezinde sondaı-aq, mashına jasaý, baılanys jáne telekommýnıkasııa baǵyttary boıynsha jumysshy mamandyqtary ortalyǵy, «Mıneraldyq shıkizat keshendi ıgerý» ınjenerlik beıindegi synaq zerthanasy, dánekerleý ınstıtýty jumysymen tanysty. Aıqyn Nesipbaı, «Egemen Qazaqstan». QARAǴANDY.