Jergilikti BAQ naqtylaǵandaı, 66 jastaǵy zeınetker múgedekter arbasynda qolyn jaıyp, bank shotyna aqsha aýdarýdy suraǵan.
Eriktilerdiń aıtýynsha, bireýler áıeldi tańerteń bazarǵa ákelip, qaıyr suraýǵa májbúrlegen.
Sadaqa suraǵan egde áıeldiń aıtýynsha, ol ystyqta da, sýyqta da dalada otyrǵan. Uzaq ýaqyt boıy ol tek nan men sýmen tamaqtanǵan degen boljam bar. Áje birinshi toptaǵy múgedekterdiń qataryna jatatyny anyqtaldy. Ol Almatyǵa kelgenge deıin Atyraý men Aqtóbede «adam satýshylarmen» birge turǵan. Sodan keıin ol basqa «qojaıyndarǵa» tapsyryldy.
«Esimde joq. Meni bir áıel adam qatty uryp-soǵyp, az aqsha ákelesiń deıtin. Biraq men kóp aqshany qaıdan alamyn?», dep bólisti zeınetker.
Zeınetkerdiń aıtýynsha, belgisiz bireýler aldymen onyń kýáligi men zeınetaqy kitapshasyn tartyp alǵan.
«Odan basqa arbaǵa tańylǵan adamdardy ákelip jatyr. Barlyǵy qorqady, sybyrlap sóılesedi. Barlyǵy kómek surap jatyr. Bul óte kúrdeli másele. Eger bul iske qoǵamdyq narazylyq týdyrmasa, adam saýdasy men olardy quldyqta ustaý jalǵasa beredi», dedi «Ádil» qaıyrymdylyq qorynyń negizin qalaýshy Oksana Maralova.
Polısııa qyzmetkerleri bul iske qatysty sotqa deıingi tergeý júrgiziletinin habarlady. Qazir tártip saqshylary bank shotynyń kimge tıesili ekenin anyqtap jatyr.
Aıta ketsek, bıylǵy jyldyń 16 mamyrynda osy jaǵdaıǵa uqsas oqıǵa bolǵan. Aqtóbe qalasynyń turǵyny eki jyl boıy quldyqta bolǵan. Er adam qaıyr suraýǵa májbúr bolǵanyn aıtty.
2023 jyldyń basynan beri Qazaqstanda adam saýdasyna qatysty 65 qylmys tirkelgen.
