Dúbirli dodanyń ashylý saltanatynda Qazaq Kuresi Assosıasııasynyń bas dırektory Erlan Estek Jızaq tórindegi jarystyń mańyzyna toqtalyp, balýandarǵa sáttilik tiledi.
«Qazaq kúresi – ulttyq sport túrleriniń ishinde ózindik orny bar tól kúresimiz. Qazirgi ýaqytta álemniń birneshe memleketinde qazaq kúresinen federasııalar qurylyp, júıeli jumys atqaryly jatyr. О́zderińizge belgili, asyl kúresimiz – qazaq kúresinen Álem, Azııa jáne Eýropa chempıonattary ótkizilip, damýdyń jańa deńgeıine kóterildi. Mine, búgin О́zbekstanda eresekter arasyndaǵy qazaq kúresinen Azııa chempıonaty ótýde. Bul is-sharalardyń barlyǵy buqara halyq arasynda salaýatty ómir saltyn nasıhattaýǵa, sporttyq dástúr men ádet-ǵuryptardy saqtaýǵa ózindik zor úlesin qosýda. Atalǵan baǵyttardaǵy jumystar aldaǵy ýaqytta da óz jalǵasyn tabady», dedi Erlan Estek.
Basshynyń aıtýynsha, qazaq kúresin keń nasıhattaý maqsatynda shetelde 50-den astam Qazaq Kuresi federasııasy jumys isteıdi. Búginde elimizde osy sport túrimen 120 myńnan astam jas shuǵyldanady. Al elimizde jyl saıyn túrli deńgeıde 800-den astam jarys ótkiziledi. Sonymen birge halyqaralyq deńgeıde Azııa kýbogy, Azııa jáne Álem chempıonattary sekildi týrnırler kópshiliktiń kóńilinen shyǵyp jatyr.
Dúbirli dodaǵa eń myqty sportshylar qatysty. Olardyń arasynda qazaq kúresimen qosa, basqa da kúres túrlerinen halyqaralyq jarystarda júlde alyp júrgen sportshylar bar. Elimizdegi ulttyq sport túrin damytý jáne qoldaý maqsatynda uıymdastyrylǵan kúres básekesi tartysqa toly bolǵany sózsiz.
Al jarys qorytyndysyna keler bolsaq, Ernur Súleımen (60 keli), Jumajan Qojambekov (74 keli), Marat Baıqamurov (100 keli), Nurdáýlet Jarylǵapov (+100 keli), Arýjan Adashan (52 keli), Raýza Nurmahambetova (56 keli), Roza Nysantaıqyzy (70 keli), Albına Baqıeva (+77 keli) altyn medalǵa ıe boldy. Dáýlet Nıetbaı (55 keli.), Aıana Zeınollaqyzy (48 keli) men Zarına Sarıpova (65 keli) ekinshi bolsa, al Aıdyn Dartaev (82 keli), Gúlim Elýbaı (60 keli), Asylhan Ǵaısaeva (66 keli) jáne Aıala Mereke (77 keli) úzdik úshtikti enshiledi.
Sóıtip, ulttyq qurama ókilderi jalpykomandalyq esepte birinshi orynǵa ıe boldy. Esep tómendegideı: I oryn – Qazaqstan (8 altyn, 3 kúmis, 4 qola), II oryn – О́zbekstan (7 altyn, 4 kúmis, 4 qola), III oryn – Tájikstan (1 altyn, 5 kúmis, 1 qola) aldy.
Jarys barysynda mereıi ústem bolǵan jeńimpazdar men júldegerler dıplomdarmen, medaldarmen jáne aqshalaı sertıfıkatpen mapapattaldy.
