Alashtyń birtýar azamaty, memleket jáne qoǵam qaıratkeri Smaǵul Sádýaqasulynyń jáne qýǵyn-súrginge ushyraǵan barsha qurbandardyń árýaǵyna quran baǵyshtaldy. Qala turǵyndary, elorda jastary, qurban bolǵan azamattardyń urpaqtary jınalyp, ǵalymdar jyly estelikterin aıtty.
«Qazirgi esep boıynsha saıası qýǵyn-súrginnen úsh mıllıonǵa jýyq adam zardap shekken. Bul qazaqtyń qasireti. Sottady, qýdalady. Sol kezde Goloshekınniń baǵdarlamasyna qarsy shyqqandardyń qatarynda Smaǵul Sádýaqasuly, Jalaý Myńbaıuly sekildi azamattarymyz boldy. Bizden qoldaǵandar da boldy», dedi saıası qýǵyn-súrgin qurbandaryn tolyq aqtaý jónindegi memlekettik komıssııa múshesi Sabyr Qasymov.
Sonymen qatar ol «Qazaq gazetteri» JShS bas dırektory Dıhan Qamzabekuly Smaǵul Sádýaqasulynyń súıeginiń kúlin elge kelýine úlken úles qosqanyn aıtty.
«Búgin qazaq eliniń táýelsizdigi úshin japa shekken asyl azamattarymyzdy eske alatyn kún. Bizge eń qymbat táýelsizdik jolynda Smaǵul Sádýaqasulynyń, onyń aǵaıyndarynyń da shekken zardaptaryn umytý múmkin emes. Osy kisilerdiń esimderin ulyqtaý − basty paryzymyz. Bul shara ár jyly Dıhan Qamzabekulynyń bastamasymen ótip júr. Bıyl sharanyń aýqymy keńeıip, qala ákiminiń tapsyrmasymen ótip jatyr», dedi Astana qalasy «Baıqońyr» aýdanynyń ákimi Erlan Álimbaıuly.
Shara sońynda tarıh ǵylymdarynyń doktory Marat Ábsemetov alash zııalylary týraly ónegeli, tarıhı aqparattarymen bólisti.
Erlan KIIKBAI,
L.N. Gýmılev atyndaǵy EUÝ stýdenti
