О́z sózinde Máýlen Áshimbaev Federasııanyń júıeli jumysynyń nátıjesinde qysqa merzimniń ishinde elimizdiń iri qalalarynda úıirme-fılıaldar ashylǵanyn aıtty.
Sondaı-aq Senat Tóraǵasy týrnırge qatysýshylar elimizde buqaralyq sportty damytýǵa úlken úles qosyp otyrǵanyn jáne bul baǵyt Memleket basshysynyń basty nazarynda ekenin atap ótti. Erekshe qajettiligi bar azamattardy qoldaý jáne ár adam ózin jaıly sezinetin kedergisiz orta qurý baǵytyndaǵy keshendi jumys – el Prezıdentiniń bastamasymen qolǵa alynǵan reformalardyń kún tártibindegi mańyzdy mindetterdiń biri.
«Qazirgi tańda elimizde ınklıýzıvti, kedergisiz orta qurý úshin barlyq jaǵdaı jasalýda. Osy jolda berik ınstıtýsıonaldy negiz qalyptasyp jatyr. Bul sala Memleket basshysy Qasym-Jomart Kemeluly Toqaevtyń únemi basty nazarynda. Prezıdentimizdiń tapsyrmasy boıynsha osy baǵytta aýqymdy jumys atqarylyp keledi. Sonyń aıasynda balalar men eresekterdiń sapaly bilim men medısınalyq qyzmet alýyna jáne sportpen shuǵyldanýyna tıisti jaǵdaı jasalyp jatyr. Osy oraıda ınklıýzıvti sport túrlerin damytý teń múmkindikter qoǵamyn qurýǵa somdy úlesin qosady dep senemin», dedi Máýlen Áshimbaev.
Sonymen qatar Palata Spıkeri bochcha elimiz úshin jańa ári qarqyndy damyp kele jatqan sport túri ekenine nazar aýdardy. Soǵan qaramastan Qazaqstan bochcha federasııasy eki jyldyń ishinde belgili bir jetistikterge qol jetkizdi.
«Bıyl biz resmı túrde Halyqaralyq federasııanyń múshesi boldyq. Bul bizdiń sportshylarymyzdyń iri halyqaralyq saıystarǵa qatysýyna jol ashady. Aldymyzda Paralımpıadalyq oıyndarǵa qatysý sııaqty naqty maqsat-mindetter tur. Qazirdiń ózinde elimizde bochchadan ulttyq qurama jasaqtaldy. Osy chempıonattyń qorytyndysy boıynsha bas komandamyz jańa sportshylarmen tolyǵady. Osyndaı kreatıvti jáne tatý komandamen birge bolǵanym úshin qýanyshtymyn. Aldaǵy ýaqytta da elimizde ınklıýzıvti sport túrlerin damytý jolynda bárimiz birlesip, nátıjeli jumys isteımiz dep senemin», dedi Máýlen Áshimbaev.
Sondaı-aq ol Senat sportshylarǵa qoldaý kórsetýdi jalǵastyra beretinin aıtty.
Jalpy, bochchadan el chempıonatyna múgedektigi bar 400-den astam bala men eresek jınaldy. Olardyń 47-si týrnırge qatysyp, baq synaıdy. Saıysqa arnaıy kelgen meımandardyń qatarynda ınklıýzııa men beıimdi sportqa qoldaý kórsetip kele jatqan belgili qoǵam qaıratkerleri men belsendi azamattar bar. Birinshilik jeńimpazdary ulttyq quramaǵa qabyldanyp, chellendj, Paralımpıada, Azııa Paralımpıadalyq oıyndary sııaqty halyqaralyq dodalarda el namysyn qorǵaıdy.
