Yntymaqtastyq týraly qujattarǵa QR Joǵary jáne joǵary oqý ornynan keıingi bilim berý uıymdarynyń rektorlar keńesiniń tóraǵasy, EUÝ rektory Erlan Sydyqov jáne QR UǴA prezıdenti Kúnsulý Zakarııa qol qoıdy.
Kelisimder sheńberinde birlesken kúsh-jiger Qazaqstanda ǵylymdy damytýǵa járdemdesýge, irgeli jáne qoldanbaly zertteýlerdiń sapasyn arttyrýǵa, olardyń nátıjelerin ekonomıkaǵa tabysty engizýge baǵyttalady. Yntymaqtastyq joǵary oqý oryndarynyń ınnovasııalyq qyzmetin damytýdy, otandyq ǵalymdardy kásibı turǵyda biriktirýge jáne olardyń ǵylymı jetistikterin tanymal etýdi, halyqaralyq yntymaqtastyqty keńeıtýdi kózdeıdi.
«Biz birlese jas ǵalymdardy qoldaýǵa, olardyń kásibı turǵyda ósýine jáne shyǵarmashylyq áleýetin ashý úshin jaǵdaılar jasaýǵa erekshe nazar aýdaramyz. Mundaı tapsyrmany Memleket basshysy Ǵylym jáne tehnologııalar jónindegi ulttyq keńestiń birinshi otyrysynda bergeni málim. Men kelisimde belgilengen baǵyttar boıynsha is-sharalardyń naqty josparyn jasaýdy usynamyn. Jaqynda Memleket basshysy Qasym-Jomart Toqaev Ulttyq quryltaıdyń otyrysynda nazar aýdarǵan qundylyqtardy qalyptastyrýǵa ǵylymı qaýymdastyqtyń qatysýy asa mańyzdy dep sanaımyn. Ádil Qazaqstandy tek adal azamattar qura alady. Adal azamat - bul adal ǵalymdar, adal tálimgerler, adal jastar», dedi QR Joǵary jáne joǵary oqý ornynan keıingi bilim berý uıymdarynyń rektorlar keńesiniń tóraǵasy, EUÝ rektory Erlan Sydyqov.
Taraptar jaratylystaný ǵylymdary, ınjenerlik-tehnologııalyq, áleýmettik-gýmanıtarlyq baǵyttaǵy ǵylymı ortalyqtar men ınstıtýttardy jáne ǵylymı qamtymdy óndiristerdi qurýdy, ǵylymı kadrlardy daıarlaýdy, ǵylymı zertteýler júrgizýdi, normatıvtik-quqyqtyq aktilerdiń jobalaryn ázirleýdi, ǵylymı-zertteý jumystaryn júrgizýdi, aqparattyq júıelerdi qurý men damytýdy, ǵalymdardyń álemniń jetekshi ǵylymı ortalyqtarynda ǵylymı taǵylymdamadan ótýin uıymdastyrýdy josparlap otyr.
«Eýrazııa ulttyq ýnıversıteti - Ulttyq ǵylym akademııasy yntymaqtastyq týraly memorandýmǵa qol qoıǵan birinshi JOO. Memleket basshysy ǵylymǵa, onyń ishinde ýnıversıtettik ǵylymǵa úlken kóńil bóledi. QR Prezıdenti janynda ǵylym jáne tehnologııalar boıynsha ulttyq keńes quryldy, Ulttyq ǵylym akademııasyna joǵary mártebe berildi, búginde ǵylym týraly jańa zań jobasy ázirlenýde. Oǵan EUÝ ǵalymdary da belsendi túrde atsalysyp jatyr. 2024 jyly Akademııanyń 4 óńirlik fılıaly Astane, Aqtóbe, О́skemen jáne Shymkent qalalarynda ashylady. Sizder bul fılıaldarmen de belsendi jumysty jalǵastyratyndaryńyzǵa senemin. Ýnıversıtettiń, ásirese jas ǵalymdardyń áleýeti ǵylymı jobalardy saraptaýǵa baǵyttalady», dedi QR UǴA prezıdenti Kúnsulý Zakarııa.
Atap ótken jón, ótken jyly EUÝ zertteý ýnıversıteti mártebesine ıe boldy. Búginde JOO ǵalymdary túrli salada 200-den astam ǵylymı jobany júzege asyrýda. 2022 jyly ǵylymnan jáne kommersııalandyrýdan túsken tabys 2021 jylmen salystyrǵanda edáýir artty. Búginde EUÝ naqty sektordyń iri kompanııalarymen baılanysty nyǵaıtýǵa jáne yntymaqtastyqty keńeıtýge, ǵylymı áleýetti arttyrýǵa basa nazar aýdaryp keledi. О́tken jyldan beri ýnıversıtet óz qarjysy esebinen kommersııalandyrý ıdeıalaryn qoldaý úshin «JANA ASU» granttaryn taǵaıyndaıdy.
