Endi mamandandyrylǵan HQKO-lar dúısenbiden jumaǵa deıin saǵat 09.00-den 20.30-ǵa deıin, senbi kúni saǵat 09.00-den 19.30-ǵa deıin jumys isteıdi.
1 shildeden bastap zańdastyrýǵa ótinimderdi qabyldaý toqtatylady. Alaıda 1 shildege deıin ótinim berip úlgergen azamattardyń avtokólikteri talaptarǵa saı keletin bolsa, kórsetilgen merzimnen keıin zańdastyrý quqyǵy beriledi.
Budan basqa, Eýrazııalyq ekonomıkalyq odaq elderinen 2022 jylǵy 1 qyrkúıekke deıin ákelingen jáne buryn tirkelgen elinen esepten shyǵarylmaýy sebebinen zańdastyrý múmkin bolmaıtyn avtokólikterdi memlekettik tirkeý týraly sheshim qabyldandy. Mundaı avtokólikter kórsetilgen merzim ótkennen keıin keri áketý týraly mindettememen 5 jyl merzimge ýaqytsha esepke alý nemese burynǵy tirkeý orny boıynsha avtokólikti esepten shyǵarǵan jaǵdaıda zańdastyrý sharttarymen tirkeledi. Ýaqytsha esepke qoıý kezinde kólik quralyn tirkeý týraly kýálik jáne Qazaqstan Respýblıkasynyń memlekettik nómirlik belgileri beriledi (memlekettik nómirlik belgiler úshin memlekettik baj – 9 660 teńge, KQTK – 4 313 teńge, ádettegi tirkeý úshin alym – 863 teńge).
Tirkeý týraly kýálikte ıelikten shyǵarý jáne Qazaqstan Respýblıkasynan tys jerlerge shyǵý quqyǵynsyz ýaqytsha esepke alý kórsetiledi. Shet memlekettiń tirkeý qujattary men memlekettik nómirlik belgileri «Azamattarǵa arnalǵan úkimet» Memlekettik korporasııasyna saqtaýǵa tapsyrylady. Eger Qazaqstan azamattary olardy elden tys jerlerge áketý týraly sheshim qabyldaǵan jaǵdaıda, olar Qazaqstan Respýblıkasynyń KQTK jáne MTNB tapsyrýy tıis, sodan keıin olarǵa tirkeý qujattary men shet memlekettiń MTNB qaıtarylady.
«Sondaı-aq mindetti avtosaqtandyrý jáne jol qozǵalysy salasyndaǵy zańnamanyń sońǵy ózgeristerine sáıkes Qazaqstan azamattary 2022 jylǵy 1 qyrkúıekten keıin ákelingen sheteldik avtokólikterge mindetti avtosaqtandyrý polısin resimdeı almaıtynyn, sondaı-aq 2022 jylǵy 1 qyrkúıekke deıin ákelingen jáne zańdastyrýdan ótpegen sheteldik esepke alynǵan kólik quraldaryna qoldanystaǵy avtosaqtandyrý polısin uzarta almaıtynyn habarlaımyz. Ákimshilik quqyq buzýshylyq týraly kodekske sáıkes mindetti avtosaqtandyrý polısinsiz avtokólikti basqarǵany úshin 10 AEK mólsherinde aıyppul qarastyrylǵanyn eske salamyz. Atalǵan jaǵdaılarda polısııa qyzmetkerleri avtokólikterdi ustap, olardy arnaıy turaqtarǵa jetkizýge quqyly», delingen habarlamada.
