Qusnıhat – bul kórkem jazý óneri. «Qushtarmyn qusnıhatqa janym tunyp, Hatkerge ishim jylyr, dilim erip, Dárıǵa-aı, sodan artyq lázzat bar ma, Hosh hatpen jazsań sózden gaýhar terip», dep qazaqtyń ataqty aqyny Áset Naımanbaıuly jyrlaǵandaı jazýdy qylqalammen qubyltyp, órnekteı bilý úlken óner.
«Tarıhqa kóz júgirtek, qusnıhat úlgisiniń tarıhy tym tereń. Al qazaq dalasyna Ámir Temir bıliginiń tusynda Samarqand pen Buqara arqyly XV ǵasyrda Iran arqyly kelgen. Astana qalasynda ornalasqan Iýnýs Emre túrik mádenı ortalyǵy 2016 jyly elorda tórinde Mýharrem Gókchenniń «Astanada qusnıhat jáne kallıgrafııa kúnderi» atty kórmesin ótkizgen bolatyn. Búgingi ótkizilip otyrǵan shara osynyń jalǵasy istettes» deıdi atalmysh mádenı ortalyq ókili Almagúl Isına hanym.
Bul jolǵy kórme tórine qazaqtan shyqqan tuńǵysh áıel kallıgraf Madına Qusaıynnyń «Qylysh», «Qyzǵaldaq», «Túńgi aı», «Ǵalam», «Mahabbat», «Kóńil gúli», «Ǵalam» kompozısııasy, «Kemshiliksiz», «Gúldi tapqan kóbelek», «Tasbıyq» t.b. 30 shaqty týyndysy halyq nazaryna usynyldy.
– Men Arqalyq qalasynyń týmasymyn. Qazir Astanada turamyn. Bala kezimnen sýret salýǵa qumarttym. Ájemniń ushtaýymen 12 jasymnan bastap ıslam áleminiń baıyrǵy týyndysy qusnıhat jazý ónerine ańsarym aýdy. Qazir bul iske tolyqtaı bet burdym. Osy aralyqta reseılik, ırandyq kallıgraftardan sabaqtar aldym. Qusnıhat úshin qajetti materıaldar men boıaýlardy Túrkııadan aldyrtyp otyramyn. Búgingi tańda 200-ge jýyq týyndym bar. Osy ónerdiń ary qaraı damýyna óz úlesimdi qosqym keledi, - dedi jas kallıgraf Mádına Qusaıyn.
Reti kelgende aıta ketken jón. Qusnıhat – sulýlyq, kórkemdik degen maǵynany beretin arab tilindegi «husn» sózinen shyqqan. Iаǵnı, ıslam jazý mádenıetiniń negizi. Bul jazýmen qazir elimizde meshit ǵımaratyn kórkemdeý keń óris alǵan.
