Ǵalymnyń aıtýynsha, elimizde ǵarysh qyzmetin damytýdyń 2005-2007 jyldarǵa arnalǵan jáne respýblıkany ındýstrııalyq-ınnovasııalyq damytýdyń 2009-2014 jyldarǵa arnalǵan memlekettik baǵdarlamalary aıasynda ǵarysh qyzmetin damytýdyń salalyq baǵdarlamasyn qabyldaý ári iske asyrý otandyq ǵarysh ǵylymynyń damýyna aıryqsha serpin bergen. Nátıjesinde 2007-2014 jyldary belgili ǵaryshker, maıtalman ınjener Talǵat Musabaev basqarǵan Ulttyq ǵarysh agenttigi ǵarysh salasynyń ǵylymı jáne ınjenerlik ózegin qalyptastyrdy. Sol arqyly ǵarysh tehnıkasynyń otandyq úlgilerin jasaý jónindegi ǵylymı ázirlemelerdiń jańa baǵyttary damydy. El ǵalymdary men ınjenerleriniń qatysýymen ǵaryshtyq baılanys jáne Jerdi qashyqtan zondtaý júıeleri qurylǵan.
«Elimizdiń joǵary dáldiktegi spýtnıktik navıgasııa júıesi dúnıege keldi. Ony tolyǵymen otandyq ǵalymdar ázirlep shyqty. Spýtnıktik navıgasııa salasyndaǵy quzyretterdi jáne ǵarysh júıeleri qyzmetteriniń túpkilikti tutynýshylary úshin kóptegen qosymshany qarqyndy damytý úshin tıisti jaǵdaı jasaldy. Ǵaryshtyq tehnıkany jáne ǵarysh qyzmetterin tutynýshylardyń apparattyq-baǵdarlamalyq quraldaryn ázirleý men óndirýdiń ǵylymı-tehnologııalyq jáne óndiristik bazalary quryldy. Bizdiń ǵalymdar men ınjenerlerdiń arqasynda ǵylymı jáne tehnologııalyq maqsattaǵy otandyq eki ǵarysh apparaty qurylyp, ushyryldy, oıdaǵydaı iske qosyldy», dep túıindedi maman.
