Áskerı rásimge Ulttyq ulannyń ardagerleri, Astana qalasy Polısııa departamenti bastyǵynyń birinshi orynbasary jáne elordalyq jedel quramanyń basshylyǵy, sondaı-aq sarbazdardyń ata-analary men týystary qatysty.
- Búgin áskerı bólimde mańyzdy oqıǵa bolyp otyr. Jas sarbazdardyń Áskerı ant qabyldaý sáti biz úshin mártebeli kúnderdiń biri. Sondyqtan bul qýanyshty jaǵdaı esterińizde erekshe saqtalady. Sizder QR Ulttyq ulanynyń sarbazdary qataryna resmı túrde qosyldyńyzdar. Búginnen bastap el tynyshtyǵyn senimdi qorǵańyzdar! 
Esterińizde bolsyn! Sizderdiń boryshtaryńyz – Qazaqstan Respýblıkasy Ulttyq ulanynyń atyn, áskerı dástúrin abyroımen jáne namyspen ary qaraı jalǵastyrý, - dedi is-sharanyń ashylýynda sóz sóılegen 5573 áskerı bóliminiń komandıri polkovnık Aıan Esjanov.
Qazaqstan Respýblıkasynyń Ulttyq ulany Táýelsizdiktiń alǵashqy kúnderinen bastap Ishki áskerlerdiń quqyqtyq mırasqory bola otyryp, eldiń qoǵamdyq qaýipsizdigi men konstıtýsııalyq qurylysyn senimdi qamtamasyz etip keledi. Jyl saıyn elimizdiń barlyq derlik óńirleri men respýblıkalyq mańyzy bar qalalarynan elordalyq jedel quramadaǵy jas jigitter Otandy qorǵaýdaǵy ózderiniń qasıetti boryshyn oryndaý úshin shaqyrylady. Munda olarǵa azamattarymyzdyń quqyqtary men bostandyqtaryn qorǵaý jóninde zor jaýapkershilik júkteledi. Búgin 5573 áskerı bóliminiń 1-2023 jylǵy shaqyrylymynda kelgen 731 sarbaz Otan aldynda Áskerı ant berdi.
Áskerı ant ár azamattyń kókeıinde máńgilikke saqtalyp qalady. О́ıtkeni, bul naǵyz jigitter ǵana arqalaı alatyn úlken jaýapkershilik. Ol eshqashan eskirmeıdi. Áskerı ant qabyldaǵan azamat kez kelgen ýaqytta, kez kelgen jasta Otanyn qorǵaýǵa daıar turady. Búgingi jerimizge ata-babalarymyzdyń arqasynda qol jetkizdik. Sol amanatty adal atqaraıyq, - dedi kópshilik aldynda sóz sóılegen Ulttyq ulan Ardagerler keńesiniń tóraǵasy general-maıor Qalıaqpar Toqyshev. 
Búginnen bastap Otan aldyndaǵy boryshyn óteýge kelgen jáne jas jaýynger kýrsynan ótken sarbazdar elimizdiń zańdy qorǵaýshylarymen bir qatarǵa turatyn bolady.
- О́z atymnan jáne Qazaqstan Respýblıkasy generaldar músheleri atynan sizderdi búgingideı erekshe kúnmen quttyqtaımyn. Jas sarbazdar qoldaryna qarý alyp, ulandyqtardyń qataryna enip otyr. Bul jerdegi soldattar áskerı boryshtaryn el astanasynda ótep júr. Bıyl − Astana qalasyna 25 jyl. Bul da bir keremet jaǵdaı dep oılaımyn. Búginnen bastap qazaq eline, qazaq jerine abyroımen qyzmet etesizder dep senemin, - dedi Ulttyq ulannyń ardaqty ardageri general-maıor Dáýlet Salhanov.
Minberde sóz sóılegender arasynda 1-oqý rotasynyń sarbazy qatardaǵy Haqnazar Dosymseıittiń ákesi Berik Dosymseıit jáne 5-oqý rotasynyń sarbazy qatardaǵy Merhat Qantaevtyń anasy Aqtolqyn Demısınova jaýyngerlerdi quttyqtady. Sondaı-aq áskerı bólimniń áskerı qyzmetshilerine alǵystaryn bildirdi. Jıynda 2-oqý rotasynyń sarbazy qatardaǵy Rahat Toqtarbaev ta sóz sóılep, qarýlastaryna jigerli sóz arnady.
Is-shara barysynda oqý pýnktiniń 5-oqý rotasynyń jaýyngerleri saptyq defıle kórsetti. Sondaı-aq ózge de sarbazdar qarý-jaraqpen túrli manıpýlıasııa oryndady. Budan bólek jıylǵan jurtqa jekpe-jek túrinen ádis-tásilder usynyldy.
