Álıhan Smaıylov Qasym-Jomart Toqaevqa batys óńiriniń energetıka júıesine jasalǵan aýqymdy taldaý nátıjesinde energetıka kásiporyndarynyń jumysynda biraz kemshilik jiberilgeni anyqtalǵanyn jetkizdi. Budan bólek Energetıka mınıstrliginiń, «KEGOC» AQ, «MAEK» JShS jáne «QazMunaıGaz» UK» AQ jumysynda olqylyqtar bar ekeni anyqtaldy.
Úkimet basshysynyń aıtýynsha, «QazMunaıGaz» UK» AQ basqarma tóraǵasy Maǵzum Myrzaǵalıevke munaı óńdeý zaýytynyń qaýipsiz jáne turaqty jumysyn qamtamasyz etý sharalaryn ýaqtyly júzege asyrmaǵany úshin sógis jarııalanady.
Oǵan qosa batys energııa torabynyń qaýipsizdigine tıisti deńgeıde baqylaý jasamaǵany úshin Energetıka vıse-mınıstri Jandos Nurmaǵanbetovke de sógis jarııalaý jóninde sheshim qabyldanǵany aıtyldy.
Sondaı-aq «MAEK» JShS, AMО́Z, «KEGOC» AQ basshylary men laýazymdy tulǵalaryna qatysty ákimshilik sıpattaǵy sharalar qoldanylady.
