Memleket basshysy Astanada ótip jatqan Qaýipsizdik jáne yntymaqtastyq jónindegi Ortalyq Azııa forýmyna qatysqany úshin Birikken Ulttar Uıymynyń delegasııasyna alǵys aıtty.
«Sizder bul forýmǵa qatysý arqyly atalǵan jıynǵa mańyzdy qoldaý kórsetip otyrsyzdar. Qazirgi álemde bolyp jatqan oqıǵalardy eskersek, konferensııanyń kún tártibindegi máseleler óte ózekti. Elimiz Birikken Ulttar Uıymynyń Jarǵysyn tolyqtaı qoldaıdy. Men bul jóninde barlyq halyqaralyq is-sharalarda únemi aıtyp júrmin. BUU-ǵa múshe basqa memleketterdiń bári Uıym Jarǵysynda bekitilgen qaǵıdattardy múltiksiz saqtaýy kerek dep sanaımyn. BUU – Qazaqstan úshin balamasy joq ári ámbebap halyqaralyq uıym. Uıymǵa múshe elderdiń árqaısysy onyń qyzmetin jetildirý isine barynsha úles qosýǵa tıis. Biz BUU Bas hatshysy Antonıý Gýterrıshtiń qyzmetin joǵary baǵalaımyz. Osy múmkindikti paıdalana otyryp, oǵan izgi tilegim men sálemimdi joldaımyn. Qazaqstanǵa keler bolsaq, bizdiń tarapymyzdan BUU-nyń keń aýqymdy qyzmetine jan-jaqty qoldaý kórsetiledi. Búginde BUU Qaýipsizdik Keńesin reformalaý qajettigi týraly kóp aıtylyp júr. Bul másele demokratııa qaǵıdattaryna saı egjeı-tegjeıli talqylaýǵa laıyq dep sanaımyz. Árbir el buǵan óz úlesin qosyp, pikirin aıta alady», dedi Qasym-Jomart Toqaev.
Kezdesý barysynda aımaqtaǵy qaýipsizdik pen turaqtylyqty qamtamasyz etý, sondaı-aq terrorıstik qaýip-qaterlerge qarsy is-qımyl máseleleri talqylandy.
BUU ókilderi Qazaqstannyń bul saladaǵy kúsh-jigerine joǵary baǵa berip, elimiz BUU-nyń terrorızmge qarsy kúres máselesinde kóshbasshylardyń biri ekenine nazar aýdardy. Vladımır Voronkov Astanada qaýipsizdik jóninde Forým ótkizýdiń mańyzdy ekenin atap ótip, bul jıyn dıalog pen ózara senimdi qalpyna keltirýge, ortaq sheshimder izdeýge arnalǵan alańdardyń birine aınalǵanyn jetkizdi.
