Premer-mınıstrdiń birinshi orynbasary Roman Sklıar men elorda ákimi Jeńis Qasymbek ınfraqurylymdyq obektiler qurylysynyń barysyn jáne jylýmen jabdyqtaý júıeleriniń aldaǵy jylytý maýsymyna daıyndyǵyn baqylady.
2023-2024 jj. kúzgi-qysqy kezeńge daıyndyq aıasynda JEO-1 jáne JEO-2-de birqatar qazandyqtar men týrbınalardy jóndeý jumysy josparlanǵan. Jumystyń bir bóligi oryndaldy. Sondaı-aq JEO-1 jáne JEO-2 aýmaǵynda gazben jabdyqtaýdyń syrtqy jelileri salyndy, JEO-1-degi barlyq 10 qazandyq agregaty men JEO-2-degi sý jylytý qazandyqtary qaıta jańartyldy. Qazandyqtardy qaıta qurýdyń basty bóligi – tabıǵı gazdy nemese kómirdi/mazýtty jaǵýǵa arnalǵan janǵysh qurylǵylardy aýystyrý.
Sondaı-aq «Astana-Energııa» AQ nysandaryn aralaý barysynda Premer-mınıstrdiń birinshi orynbasary men Astana ákimi jabdyqtardyń tozýyn azaıtý, elordany senimdi energııamen jabdyqtaýdy qamtamasyz etý, sondaı-aq qorshaǵan ortaǵa keri áserdi barynsha azaıtýǵa baǵyttalǵan jańa tehnologııalardy engizý úshin iske asyrý josparlanyp otyrǵan perspektıvaly jobalarmen tanysty.
Elorda ákimi Jeńis Qasymbek qalany qosymsha jylýmen qamtamasyz etý úshin «Turan» jáne «Ońtústik-Shyǵys» eki gaz jylý stansııasynyń qurylysy júrgizilip jatqanyn atap ótti. Olardyń qýaty qurylysy uzaqqa sozylǵan JEO-3 qýatynan asyp túsedi. Osy gaz jylý stansııalaryn aldaǵy jylytý maýsymynda kezeń-kezeńimen iske qosý josparlanyp otyr.
Nysandardy aralaý barysynda Premer-mınıstrdiń birinshi orynbasary men Astana ákimi jańa sorǵy-súzgi stansııasynyń (SSS-3) jumysymen tanysty. Maýsym aıynda SSS-3 jumysynyń birinshi kezeńi iske qosyldy, sondaı-aq Astana sý qoımasynan sý tartqyshtyń jańa tarmaǵynyń qurylysy aıaqtaldy. Bul qaladaǵy sýmen jabdyqtaý máselelerin sheshýge múmkindik berdi. SSS-3 ekinshi kezeńin osy jyldyń tamyz aıynda aıaqtaý josparlanyp otyr. Budan basqa, Nura jerasty sý ken ornynan sý qubyryn jobalaý jáne Telman eldi mekeninde SSS qýatyn keńeıtý boıynsha jobalaý aıaqtalyp qaldy. Bul jobalar qalany odan ári de aýyz sýmen qamtamasyz etý úshin qosymsha múmkindik beredi.
Aralaý barysynda merdigerlerdiń aldyna belgilengen merzimde gaz jylý stansııalarynyń, JEO-3, SSS-3 (2-kezeń) qurylysyn aıaqtaý mindeti qoıyldy.
