Keshegi jarys kúninde jerlesterimiz el qorjynyn kúmis medalmen tolyqtyrdy. Atap aıtqanda, jýyrda ǵana VI jazǵy Spartakıadada kúmis medal oljalap, birneshe aı buryn Djakartada ótken Álem kýboginde top jarǵan Arına Altýhova jasóspirimder arasyndaǵy jahandyq dodanyń úzdikter qatarynan kórindi.
Sportty damytý dıreksııasynyń málimeti boıynsha, otandasymyz kishi kalıbrli vıntovkamen 50 metrden 3 pozısııada (tik turyp, jatyp, tizerlep turyp) oq atyp, 455,7 upaımen kúmis medal ıelendi. Bul jattyǵýda Vıven Djoı Djeggı (Shveısarııa) álem chempıony atandy. Ol bizdiń Arınadan 1,6 ball artyq jınady. Qola medal taǵy bir shveısarııalyq sportshy Emelı Djeggıge buıyrdy. Munyń aldynda ulttyq qurama úzdigi Nıkıta Chırıýkın kishi kalıbrli tapanshamen 25 metrden oq atýda top jarǵan edi. Medal kestesinde Qazaqstan quramasy 1 altyn, 1 kúmispen 10-orynǵa turaqtady. Kósh basynda Qytaı sportshylary tur. Olardyń enshisinde 6 altyn, 8 kúmis, 4 qola bar.
