Esterińizge sala keteıik, buǵan deıin oblys ákiminiń Panfılov aýdanyndaǵy rezıdensııasy balalardyń emdeý-saýyqtyrý orny retinde qaıta jabdyqtalǵan edi. Endi, mine, «Jansaıa» kúndizgi ońaltý ortalyǵy jazǵy demalys úıi retinde resmı jumysqa kiristi.
Demalys úıiniń aýmaǵy keń, barlyq qolaıly jaǵdaı jasalǵan, jasyl jelekke bólengen. Aýmaǵynda ornalasqan ǵımarattyń jalpy kólemi – 200,3 sharshy metr. Jobalyq qýaty 40 orynǵa arnalǵan. Jaz aılaryndaǵy ár demalys maýsymy 5 kúnnen turady. Jazǵy demalys kezindegi 5 maýsymda 200 bala qamtýdy josparlanǵan. Demalýshylarǵa jazǵy kezeńde 24 shtattyq birlik qyzmet kórsetedi.
Demalys orny balalarǵa arnalǵan jatyn tósekter, jeke zattar, kıimder salynatyn shkaftar, túrli jumsaq jıhazdarmen túgel qamtylǵan. Ashana qajetti qural-jabdyqtarmen tolyq jabdyqtalǵan. Syrtqy aýlaǵa oıyn alańqaılary men sý basseıni salynǵan. Sonymen qatar jazǵy kezeńde demalýshylardyń ómiri jáne densaýlyq qaýipsizdigine baılanysty alǵashqy medısınalyq kómek kórsetýge jáne órtke qarsy dabyl berý, órt sóndirýge qajetti quraldarymen qamtylyp, beınebaqylaý ornatylyp, ǵımarattarda múgedekterdiń júrip-turýyna qajetti jaǵdaı jasalypty.
Demalys ornynyń ashylý saltanatyna kelgen aýdan ákimi Almas Ábdinov: «О́zderińiz biletindeı, bizdiń elde balalar erekshe qamqorlyqta. Memleket basshysynyń ózi osy baǵyttaǵy jumystardy baqylaýǵa alǵan. Osy oraıda Jetisý oblysynda jetkinshekterge barlyq jaǵdaı qarastyrylǵanyn aıta ketken jón. Oblys ákiminiń qoldaýymen úlken ister atqarylyp jatyr. Beıbit О́ksikbaıuly aýdanymyzǵa kelgende kól jaǵalaýynda múgedek balalarǵa arnalǵan demalys ornyn ashý qajettigin aıtqan edi. Búgin sol tapsyrmanyń oryndalǵanyna kýá bolyp otyrsyzdar. Syrt kómekke muqtaj jetkinshekterimiz osynda demalyp, em alatyn bolady. Aldaǵy kezderi de balalarǵa qamqorlyq, qoldaý isteri jalǵasady», dedi ákim.
Odan keıin oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń mindetin atqarýshy Ermek Mızambaev demalýshylarǵa tilegin arnap, osy baǵytta atqarylyp jatqan jumystarǵa toqtaldy. Aýdandyq ardagerler keńesiniń tóraǵasy Sataı Bekbolatov aq batasyn berip, ıgi isterge ilgerileý tiledi. Demalyp, em alýǵa kelgen balalardyń ata-analary atynan sóz alǵan Sálıma Tólepbergenova jan jylýyna muqtaj jetkinshekterge jaǵdaı jasap otyrǵan azamattarǵa jurtshylyqtyń alǵysyn jetkizdi.
Aıdyn kóldiń jaǵasyndaǵy demalys ornynyń lentasy qıylyp, shashý shashyldy. Qurmetti qonaqtar men demalýshy balalardyń ata-analary ǵımaratty, aýlany aralap kórip, jetkinshekterge qajetti jaǵdaıdyń bári jasalǵanyna kóz jetkizdi.
