Veloshabandozdardyń mártebeli jarysynda altynshy kezeńnen bastap kóshbasshylyqty óz qolyna alǵan Ionas Vıngegor 15 kezeń boıy aldyna jan salmady. Tipti úsh kezeńde márege birinshi jetken 25 jastaǵy belgııalyq Iesper Fılıpsen men eki kezeńde úzdik shyqqan, 2020 jáne 2021 jyldarǵy «Týr de Fransta» top jarǵan Slovenııanyń dańqty sportshysy Tadeı Pogachar da Vıngegorǵa jete almady.
Bıylǵy Grand-týrdaǵy negizgi báseke Pogachar men Vıngegor arasynda órbidi. Eki veloshabandoz jarystyń 6-shy kezeńinen bastap 16-shy kezeńine deıin kósh basynda ıyq tirestirip keldi. Tek 16-kezeńnen keıin Tadeı Ionastyń qarqynyna tótep bere almaıtyny belgili boldy. Jekeleı kezeńde danııalyq sportshy Pogachardy 1 mınýt 38 sekýndqa qapy qaldyrdy. Al kelesi kúngi Sen-Jerve-le-Ben men Kýrshevel qalalaryn jalǵaǵan 165,7 shaqyrymdyq taýly kezeńde Vıngegor márege tórtinshi bolyp kelse de, Pogachardy 7 mınýt 35 sekýndqa shań qaptyryp, bas júldeniń máselesin sol kezde-aq sheship qoıdy. Sóıtip Ionas Vıngegor qatarynan ekinshi jyl «Týr de Fransta» úzdik shyqsa, Tadeı Pogachar ekinshi márte ekinshi orynǵa turaqtady. Al úzdik úshtikti brıtanııalyq Adam Ieıts («UAE Team Emirates») túıindedi.
О́kinishke qaraı, «Astana» komandasy bıylǵy «Týr de Fransty» óte sátsiz ótkizdi dep aıtýǵa bolady. О́ıtkeni byltyrǵy básekeniń jalpy esebinde Alekseı Lýsenko 9-orynnan kóringen bolsa, bıyl «Astananyń» birde-bir ókili úzdik ondyq bylaı tursyn, TOP-30 sportshynyń qataryna da ilige almady. «Astanany» órge súıreıdi degen maqtaýly Mark Kavendıshtiń ózi Grand-týrdyń bel ortasyna jetpeı jarys jolynan shyǵyp qaldy. Nátıjesinde, kolýmbııalyq Harold Tehada «Týr de Fransty» 34-shi, Alekseı Lýsenko 40-orynmen aıaqtady. Komandalyq esepte «Astana» 22 ujymnyń ishinde nebári 18-satyǵa turaqtady.
