«Esik aldynda tórt dosymmen turǵan edik. Aqyryndap aldymen tútin shyǵa bastady. Eshkim joq ol kezde. Aldymen birneshe balany, qyzdy alyp shyqtym. Odan keıin tútin qoıýlanyp ketti. Joǵary qabattan jaımalardy bir-birine baılap, taǵy bir balany túsirdim. Tómende jigitter ony qaǵyp aldy. 15-20 mınýtta 4 ret osylaı kóterilip shyqtym. Odan keıin bizdi ǵımaratqa jolatpaı qoıdy», dedi Dáýletqalı Nurlanuly.
Dáýletqalı osy kezde birinshi qabattaǵy páterdiń biriniń terezesinen kilem, matrasty kórgenin aıtty.
«Terezeni syndyrdyq ta olardy alyp shyqtyq. Olarmen kem degende 7-8 adamdy tosyp aldyq», deıdi.
Sondaı-aq Erik Tókenuly esinen tanyp qalǵan úlken kisige jasandy jolmen dem berip, alǵashqy medısınalyq kómek kórsetkenin aıtty.
«Bir kezde esin jınady, jedel járdem kóligine salyp jiberdik. Bir áıel 6-qabattan eki balasyn laqtyrdy. Matraspen tosyp aldyq. Odan keıin ózi jáne ápkesi sekirdi. Sol kezde ózi esinen tanyp qaldy. Oǵan da dem berip, esin jıdyrdyq», deıdi Erik Tókenuly.
