Indýstrııa jáne ınfraqurylymdyq damý mınıstri Marat Qarabaev qazaqstandyq kásiporyndardyń ishki naryqqa óńdeý ónerkásibi ónimderin jetkizýdi $46 mlrd-tan astamǵa arttyrýǵa múmkindigi bar ekenin, atap aıtqanda, munaı-gaz mashına jasaý ónimderine (armatýra, sorǵylar, jabdyqtar), qurylys materıaldaryna (tusqaǵazdar, qabyrǵa jabyndary, lamınat, keramıka), kıim-keshek, aıaqkıim, tyńaıtqyshtarǵa jáne t. b. suranys joǵary ekenin jetkizdi.
Kásipkerlerdi qoldaý jáne yntalandyrý maqsatynda Úkimet ınfraqurylymdy damytý, jeńildetilgen qarjy bólý jáne otandyq óndirýshiler salyqtyq jeńildikter, sýbsıdııalar jáne basqa da qoldaý túrlerin ala alatyn ofteık-kelisimsharttar jasaý boıynsha sharalar qabyldaıdy.
Kezdesý barysynda orta bıznes ókilderi óz qyzmetteri jaıly toqtalyp, birqatar túıtkildi máselelerdi kóterdi. Atap aıtqanda, jalpy qýaty jylyna 40 myń tonnadan astam ónim shyǵaratyn metall buıymdaryn ystyqtaı myryshtaý zaýytynyń qurylysy; soıý alańy men tońazytqysh qoımalary bar, etti qaıta óńdeý jáne shujyq ónimderin ótkizetin 10 myń basqa arnalǵan mal sharýashylyǵy keshenin qurý; taý shańǵysy, frıstaıl jáne jasandy qarmen snoýbord tebý boıynsha oqý-jattyǵý ortalyǵy, sondaı-aq basqa da birqatar nysan qurylysy boıynsha jobalar tanystyryldy.
Sonymen qatar jeńildetilgen nesıelendirý men sýbsıdııalaý, mal azyǵyn daıyndaý, jol qurylysy, kóterme saýda-taratý ortalyqtary men kókónis qoımalaryna qatysty máseleler talqylandy. Budan basqa, Alakól jáne Balqash kóliniń demalys aımaqtaryn damytý barysy jan-jaqty talqylandy.
Atap aıtqanda, «Alakol Kazakhstan» JShS dırektory Elena Asylbekova týrıstik nysandardy turaqty elektr energııasymen, ortalyqtandyrylǵan sýmen jabdyqtaý jáne káriz júıesimen qamtamasyz etý, áýe qatynasyn keńeıtý, sondaı-aq demalys aımaqtarynda baılanys pen ınternet sapasyn jaqsartý qajettigi týraly aıtty.
Taǵy bir ózekti taqyryp qoı sharýashylyǵyn damytý boldy. «Eurasia Agro Semey» JShS basshysy Erlan Muqashev shıkizatty óńdeýdi qatar damyta otyryp, mal sanyn 50-100 mln basqa deıin arttyrý joǵary áleýetin atap ótti. Onyń aıtýynsha, bul Qazaqstandy qoshqar, qozy jáne qoı etiniń iri eksporttaýshylary qataryna qosýy múmkin. Kásipker sondaı-aq qazaqy qozy men qoıdyń ulttyq brendin qurý ıdeıasyn aıtyp, tıisti bıznes-bastamaǵa ýákiletti memlekettik organdar arqyly keshendi qoldaý kórsetýdi surady.
Premer-mınıstr Qaraǵandy, Shyǵys Qazaqstan, Abaı jáne Ulytaý oblystarynyń orta bıznesti damytý áleýeti óte joǵary ekenin atap ótti. Jalpy sońǵy úsh jylda atalǵan óńirlerde 17 myńnan astam joba túrli memlekettik qoldaý sharalarymen qamtyldy.
«Kásipkerliktiń damý qarqyny jaqsy. Ekonomıkadaǵy ShOB úlesi 36,5%-ǵa deıin, osy salada jumyspen qamtylǵandar sany 18%-ǵa ósti. Bıznestiń naqty problemalaryn sheshý arqyly bul trendti saqtap qalý kerek», dedi Álıhan Smaıylov.
Úkimet basshysy qazirgi ýaqytta respýblıkada bızneske qoıylatyn artyq retteý talaptary qysqartylyp, memlekettik baqylaý men qadaǵalaýdy avtomattandyrý júrgizilip jatqanyn, bul kelesi jyldan bastap táýekelderdi basqarý júıeleri negizinde arnaıy mamannyń qatysýynsyz tekserý taǵaıyndaýǵa múmkindik beretinin aıtty. Bul tekserýler sanyn azaıtyp, olardyń tıimdiligin arttyrady.
Qorytyndylaı kele, Premer-mınıstr ýákiletti memlekettik organdarǵa kásipkerlerdiń usynystaryn muqııat zerdeleýdi jáne kezdesý barysynda kóterilgen problemalyq máselelerdi sheshýdi pysyqtaýdy tapsyrdy.
