Kóksý aýdanynda ákimmen serýen aksııasy ótip jatyr. Kóksýlyqtar aýdan basshysy Marlen Kólbaevpen birge tańbozynan jattyǵý jasap, túrli is-sharaǵa qatysyp keledi.
Kórse kóńil shalqıtyn Kóksý aýdanynyń turǵyndary jazdyń ár kúnin aýdan ákimimen birge ótkizip júr. Ertemen aýdan stadıonyna jınalǵan ardagerler men sportshylar, odan bólek oqýshylar men jasóspirimder M.Kólbaevpen birge birneshe shaqyrym jol júredi. Bul salamatty ómir saltyn saqtaýda taptyrmas ádis ekeni anyq.
«Aýdan basshysynyń bul ıgilikti isi turǵyndardyń ystyq yqylasyna ıe boldy. Ári jastarǵa úlken motıvasııa. Birinen biri ótetin is-sharalar uıymdastyryp keledi. Halyq ta bir ýaqyt rýhanı demalyp, kóńilderi kóterilip qaldy», deıdi Almatydan qonaqqa kelgen Ásııa Armanqyzy.
Halyqtyń bos ýaqytyn tıimdi uıymdastyrý maqsatynda Mádenıet úıiniń aldynda otandyq jáne sheteldiń úzdik fılmder men mýltfılmder úzdiksiz kórsetilip otyr. Qońyr túnniń samalymen ashyq aspan astynda úlken ekrannan kıno kórgen kóksýlyq jastardyń kóńili shat. Sol mańǵa jınalǵan jetisýlyqtarǵa tegin qarbyz ben balmuzdaq usynylyp, arnaıy vıktorınalar oınatylady. Tipti syılyqtar da tabystalady. Sodan soń bı keshi bastalady.
Ár aptanyń dúısenbi, sársenbi jáne juma kúnderi B.Ońǵarov atyndaǵy ortalyq stadıonda ákimmen keshki serýendeýińizge bolady. Bul is-shara aıdyń aıaǵyna deıin jalǵasyn tappaq. Qatysýshylarǵa tolyq 10 000 qadam júrgenshe toqtaý joq, ákimmen kez kelgen taqyrypta áńgimelesýge bolady.
