«Dala pıramıdasy óte dáldikpen salynǵan: alty qyrly. Árbir qyrynyń arasy on úsh metr jáne segiz qatar taspen qalanǵan. Ortasynda birneshe sheńberleri bar. Bul – óte kúrdeli keshendi qurylys. Sol keshendegi qurylystyń syrtyndaǵy qabyrǵalarynda ártúrli janýarlardyń, ásirese jylqynyń sýretteri kóp beınelengen. Sonymen qatar túıeniń de beıneleri bar. Qazbadan tabylǵan málimetter, qysh ydystar, áıel adamnyń altyn syrǵasy jáne taǵy basqa áshekeı buıymdar osy qola dáýiriniń úlken kóne dáýirde mádenıeti, oshaǵy bolǵandyǵyn kórsetedi», dedi tarıhshy ǵalym, EUÝ arheologııa jáne etnologııa kafedrasynyń meńgerýshisi Ulan Úmitqalıev.
2014 jyldan bastap EUÝ tarıh fakýlteti arheologııa jáne etnologııa kafedrasynyń ǵalymdary Abaı oblysy, Abaı aýdany Toqtamys eldi mekeniniń janyndaǵy Qyryqúńgir keshendi eskertkishinde arheologııalyq qazba jumystaryn júrgizip keledi. Oǵan ýnıversıtet stýdentteri men magıstranttary atsalysty. Júrgizilgen zertteý jumystarynyń nátıjesinde Eýrazııa dalasynda kezdespeıtin iri kólemdegi bizdiń dáýirimizge deıingi ekinshi myńjyldyqtyń basy, ıaǵnı osydan tórt myń jyl burynǵy qola dáýiriniń dala pıramıdasy tabyldy.
