Memleket basshysyna mınıstrliktiń aqparat, qoǵamdyq damý, din jáne etnosaralyq qatynastar, azamattyq sektor, sondaı-aq jastar jáne otbasy saıasatyn júzege asyrý baǵytynda atqaryp jatqan jumystary jóninde baıandaldy.
Darhan Qydyráli mınıstrlik óz jumysynda otandyq teleserıaldar óndirisi kólemin ulǵaıtyp, olardy shetelge taratýǵa, medıa saýattylyqty arttyrýǵa, sondaı-aq azamattyq qoǵammen ózara qarym-qatynasty jandandyrýǵa aıryqsha mán berip otyrǵanyn jetkizdi.
Memleket basshysy mınıstrlik azamattyq qoǵam ınstıtýttarymen barlyq deńgeıdegi baılanysty kúsheıtip, ár saladaǵy ózekti máselelerdi qoǵammen keń kólemde talqylaýǵa ashyq bolýy qajet ekenin atap ótti.
Sonymen qatar Qasym-Jomart Toqaev Darhan Qydyrálige jastar saıasatyna qatysty baǵdarlamalardy tıimdi júzege asyrýdy, dinı birlestikter men etnosaralyq qarym-qatynas baǵytyn aıryqsha nazarda ustaýdy tapsyrdy.
