Búginde Taldyqorǵannyń irgesindegi Kóktal aýylynda ornalasqan sheberhana óz jumysymen kópshilikti qýantyp keledi. Byltyr ǵana ashylǵan sheberhana az ýaqytta jetisýlyqtardyń kóz qýanyshyna aınalyp úlgergen. Tutynýshylar úshin baǵasy da tıimdi, al tapsyrys bergen adamnyń eshbiri ókingen emes. Bári muqııat tigilip, suranysqa saı qyzmet kórsetedi.
«Sheberhana ashý – anamyzdyń ıdeıasy. Anamyzdyń bastaýymen iske kiriskenbiz. Otbasylyq bir is bastaýdy josparladyq jáne ol qazir jemisti bolyp jatyr. Bastapqyda tek kórpemen aınalysamyz degen oı bolǵan, artynsha tigý sheberhanasyn ashtyq. Qazir qyz jasaýy, eski kórpeni jańartý, tór kórpeler, matrastar, balalarǵa arnalǵan kórpeler tigýmen aınalysamyz. Búginde tek Taldyqorǵannan emes, jan-jaqtan tapsyrys kóp túsedi. Anamyz jaqynda baqıǵa attandy. Anamyz bastap ketken isti mura retinde qarap, baǵalap, jumysymyzdy adal jáne tııanaqty jalǵastyryp kelemiz», deıdi jas sheber.
Saltanattyń anamyz dep otyrǵany – enesi Almagúl Ońǵarbaeva. О́miriniń sońǵy jyldarynda óńirdegi «Atameken» kásipkerler palatasynda adamı kapıtaldy damytý bóliminiń basshysy bolǵan. Al Saltanat kishi uly Ádilettiń jary.
Atalǵan sheberhanada jún jýý, jún tútetin, kórpe syrý mashınasy, matras tigetin, keskindeıtin lazer apparaty jáne tigin mashınasy bar. Barlyq qurylǵyny Qytaıdan arnaıy tapsyryspen alǵan. Jahandyq indettiń saldarynan keıbir tehnıkalyq jabdyqtar keshigip jetken eken. Jaqyn arada jastyqty qaıta óńdeý mashınasyn alýdy josparlap otyr. Al matalardy Almatydan alady. Tutynýshylardyń suraýymen jáne jeke sheberlerdiń tájirıbesine súıenip ártúrli sapadaǵy matalarmen jumys isteıdi.
«Kóktem men jaz aılarynda tapsyrys kúrt ósedi. Toı-tomalaq kóp, ásirese jańadan otaý qurǵan jastar túrli nusqada kórpe, jastyq tigýimizdi suraıdy. Degenmen shúkir, jumysymyz jyldyń barlyq mezgilinde de toqtaǵan emes. Úılený maýsymy báseńdegen soń kóbinese kórpelerdi qaıta óńdeýmen aınalysamyz. Erinbeseńiz is kóp, tek sonyń jolyn taba bilý qajet», deıdi S.Záýrenbek.
Shyny kerek, bizdi qyzyqtyrǵan ene men kelin arasyndaǵy ystyq baılanys. Qazaqtyń dástúrli uǵymynda ene – úlken mektep. Muny jas kelin jaqsy baǵamdaǵan. Tigin sheberhanasyn birlesip ashý arqyly marqum enesinen kóp is úırengenin jasyrmaıdy. Aıtqan aqyly, kórsetken ónegesi jadynda. Igilikti isti búginde úzbeı jalǵastyryp, abyroı bıiginde otyr. Tipti keleshekte sheberhanany keńeıtip, odan ári damytýǵa kúsh salmaq.
«Enem anamdaı bolyp ketken aqyldy, parasatty, eńbekqor jan edi. Shyny kerek, osyǵan deıin tigin tigý jaǵyn bilmeıtinmin, enemniń janynda júrip úırendim. Búginde bul iske úlken mahabbatpen kirisemin. Alǵa qoıǵan maqsatymyz kóp. Satylym aınalymyn ósirsek, jumys oryndaryn kóbeıtsek, ózimizdiń dúkenimizdi ashyp, taza ekologııalyq taýarymyzdy qazaqy naqyshta shetelderge eksporttap, «Maqta qyz» ónimderin brendke aınaldyrsaq degen armanymyz bar. Bastaǵanda arman edi, armanymyz maqsatqa aınaldy. Alda jumys kóp, tek eńbektenýimiz qajet», deıdi kásipker kelin aǵynan jarylyp.
Jas kásipker memlekettiń shaǵyn jáne orta bıznesti damytýǵa arnalǵan jobalary aıasynda qurylǵylarymyzdy tómengi paıyzben nesıege alǵan. Qosymsha jumyspen qamtý ortalyǵy jumysshylardy jalaqymen demep otyrady. Bul turǵyda memlekettik jobalarǵa óz alǵysyn bildirip jatyr. Qazir taýarlarǵa barynsha jarnama jasap, basqa óńirlerge de satýdy oılastyryp júr.
Iá, qalaı bolǵanda da erinbegen adam eńbekpen bıikke shyǵady. Jetisýda mundaı jastar kóp. Túrli salada óz baǵyn synap jatqandarǵa oblys ákimdigi barynsha járdemdesip keledi. Máselen, alǵash ret jastardyń bastamalaryn qoldaý maqsatynda «Táýelsizdik urpaqtary» grantyna baıqaý jarııalandy. Mádenıet, ǵylym, bıznes, medıa jáne IT salalary boıynsha 100-ge jýyq joba qabyldanyp, sonyń ishinde 10 joba qoldaý tapty. Kúni keshe «Jetisy jastary» ortalyǵynda sol jalyndy jastarǵa qaıtarymsyz 3 mıllıon teńgelik sertıfıkat tabystaldy. Bul óńirge Saltanat sekildi isker taǵy da 10 jas kásipker qosyldy degen sóz.
Jetisý oblysy
