Syrtqy ister mınıstrliginiń resmı ókili Aıbek Smadııarov Ońtústik Koreıada avtobýs júrgizýshisine shabýyl jasaǵan Qazaqstan azamaty ol elge qandaı sebeppen barǵanyn aıtty.
«Oqıǵa jaıly keshe habar aldyq. Mán-jaıyn anyqtap kórdik. Ol sol elde kúıeýimen birge biraz jyldan beri turyp keledi, sol jaqta kásibin aınaldyryp júrgen. Oǵan etnıkalyq kýálik berildi. Sondyqtan ol etnıkalyq káris bolyp sanalady», dedi Syrtqy ister mınıstrliginiń resmı ókili búgingi brıfıng barysynda.
Aıbek Smadııarovtyń aıtýynsha, Ońtústik Koreıada ustalǵan Qazaqstan Respýblıkasynyń azamaty 2020 jyldan beri mamandandyrylǵan aýrýhanada emdelip júrgen. Ol bul ersi áreketti sol dári-dármektiń áserinen jasaýy múmkin.
«Ol Ońtústik Koreıada emdelip júrgen. Birer kúnde oǵan konsýl barady. Jaǵdaıdy baqylaýda ustaımyz», dep túıindedi spıker.
