Áleýmettik jobalarǵa – 4 mlrd teńge
«Halyq» qory Mańǵystaýdaǵy áleýmettik jobalarǵa qoldaý kórsetip otyr. Bul maqsatqa 4 mlrd teńgeden asa qarajat jumsalmaq.
Mańǵystaý oblysynyń ákimdigi men «Halyq» jeke qaıyrymdylyq qory yntymaqtastyq týraly úsh memorandýmǵa qol qoıdy. Bólingen qarajat Jańaózende dene shynyqtyrý-saýyqtyrý ortalyǵy men 20 aýla alańyn salýǵa, Beıneýdegi astyq termınalynyń jumysyn qalpyna keltirýge jáne jańǵyrtýǵa jumsalady.
Sý tushytý zaýyty salynady
Túpqaraǵan aýdany Aqshuqyr aýylynda qýattylyǵy táýligine 4 myń tekshe metr sý tushytý zaýyty salynady.
Túpqaraǵan aýdany ákiminiń mindetin atqarýshy Talǵat Altynǵalıevtiń aıtýynsha, Aqtaýǵa jaqyn ornalasqan Aqshuqyr jáne Saın Shapaǵatov aýyldarynda da sý tapshylyǵy oryn alyp otyr. «Halyq» qory jobany qoldaýǵa 300 mln teńge bóledi.
Ortalyq qudyq arqyly aýyz sýǵa qol jetkizgenderdiń biri – Talshyn Maqsutkyzy. Qazir ol óz baqshasyna jaqsy kútim jasaı bastaǵaly aǵashtar jemis bere bastaǵanyn aıtady.
«Osy kóktemnen bastap úıimizge ortalyq júıeden sý kele bastady. Mańǵystaý óńirinde jaz óte ystyq ekenin bilesizder. Men balalarmen birge baqshamyzdy sýaryp, endi eńbegimizdiń jemisin jınaı alatynymyzǵa qýanyshtymyn. Bul úshin «Halyq» qaıyrymdylyq qoryna alǵysymdy bildirgim keledi», dedi Saın Shapaǵatov aýylynyń turǵyny.
Sport ortalyǵy boı kóteredi
Qor qazirgi zamanǵy dene shynyqtyrý-saýyqtyrý ortalyǵyn salýǵa 1,4 mlrd teńge bóledi. Sondaı-aq Jańaózende 20 aýla balalar alańyn salady.
Jańaózende jańa sport ortalyǵynyń qurylysy turǵyndardyń densaýlyǵyn jaqsartýǵa ǵana emes, jańa jumys oryndaryn qurýǵa da yqpal etedi. Onyń qurylysy kezinde 150 ýaqytsha jumys orny, al ashylǵannan keıin 50 turaqty jumys orny paıda bolmaq.
Jańaózen qalasy máslıhatynyń hatshysy Saqı Myńbaıdyń aıtýynsha, nysandardy salý balalarǵa ǵana emes, jastarǵa da tıimdi bolady.
«Qazir halyq sany artyp keledi. Jańa jumys oryndarynyń ashylýy jastardy shabyttandyrady. Sonymen qatar balalarymyz da jańa aýla alańdaryna qýanatyny anyq. Jas urpaqtyń mádenı ortada qalyptasýy mańyzdy. Jańa jumys oryndary olardyń damýyna tikeleı áser etedi. Mundaı jobalardyń kóp bolǵanyn qalaımyz», dedi S.Myńbaı.
Dene shynyqtyrý-saýyqtyrý ortalyǵy – bul adamdar boks, kúres, shaǵyn fýtbol, tennıs, voleıbol jáne basketbol sııaqty túrli sport túrlerimen aınalysa alatyn sport mekemesi. Ortalyq sportzalmen, kıim aýystyratyn bólmelermen jáne dýsh bólmelerimen jabdyqtalǵan.
Aýla alańdaryna keletin bolsaq, qazir ákimdik 20 ýchaskeni tańdaıdy. Jańaózenniń 55 jyldyǵyna oraı qurylys aıaqtalyp, qala turǵyndaryna tapsyrylýǵa tıis.
Astyq termınalyn qalpyna keltiredi
2021 jyly Beıneý astyq termınaly bankrot dep tanylyp, birneshe jyl jumys toqtap qaldy.
Prezıdent Qasym-Jomart Toqaev Mańǵystaý oblysynyń áleýmettik-ekonomıkalyq damýy jónindegi keńeste termınal qyzmetin qaıta bastaý qajettigin atap aıtqan bolatyn.
Endi Mańǵystaý oblysynyń ákimdigi men «Halyq» qory Beıneý astyq termınalynyń jumysyn qaıta bastaý úshin 1,8 mlrd teńgege qaıyrymdylyq kómek kórsetý týraly Memorandýmǵa qol qoıdy. Bul óńirdi unmen jáne jemmen qamtamasyz etýge, sonymen qatar Ortalyq Azııa elderine (О́zbekstan, Túrikmenstan, Aýǵanstan, t.b.) eksporttyq áleýetti iske asyrýǵa múmkindik berýge tıis.
Beıneý aýdany ákiminiń orynbasary Jalǵas Temirovtyń aıtýynsha, bul termınaldyń jumysy 2018 jyly toqtatylǵan.
«Kompanııanyń belgili bir qaryzdaryna baılanysty bul iri termınaldyń jumysy 5 jyl boıy toqtap turdy. Termınaldyń ónimdiligi jylyna 90 myń tonna astyq pen 30 myń tonna etti quraıdy. Jumystyń qaıta jandanýy arqyly halyqty astyqpen qamtamasyz etý jáne jumysqa ornalastyrý máselesi sheshilip jatyr. Jaqyn arada jumysqa 200-den asa adam qabyldanady. Bul jergilikti turǵyndar úshin óte mańyzdy», dedi J.Temirov.
«Halyq» qorynan alynǵan aqshaǵa Mańǵystaý oblysynyń ákimdigi «Kaspıı» áleýmettik-kásipkerlik korporasııasymen birlesip, Beıneý aýdanyndaǵy astyq termınalyn qalpyna keltirip, odan ári jumys isteýge baǵyttalǵan qyzmetti úılestirýdi qamtamasyz etedi.
