Sońǵy málimetterge qaraǵanda, sýǵa batqan 11 adamnyń ishinen tótenshe jaǵdaılar departamenti qyzmetkerleriniń kúshimen 9 adamnyń, onyń ishinde 3 áıeldiń jáne 6 balanyń denesi tabylyp, sýdan shyǵaryldy, 2 kámeletke tolmaǵan balany izdestirý jumystary júrgizilýde. Túrkistan oblysy ákimdiginiń baspasóz hatshysy Mıra Músilimniń habarlaýynsha, bir áýlettiń músheleri toıdan keıin ózen jaǵasyna demalýǵa toqtaǵan. «Eshkimniń sýǵa túsý týraly oıy bolmaǵan, ıaǵnı arnaıy sýǵa túsý úshin toqtamaǵan. Jaǵa taıǵaq bolǵan soń bireýiniń aıaǵy taıyp ketken. Artynsha basqalary ony qutqarýǵa umtylǵan. Olardyń barlyǵy shomylatyn jer emes ekendigin bilgen. Sebebi eshbiri sýǵa shomylatyn kıimmen túspegen. Al aman qalǵan otbasy múshelerine kórshileri men aǵaıyndary kómektesken», dedi Mıra Músilim. Qaıǵyly oqıǵaǵa baılanysty oblystyq tótenshe jaǵdaılar departamenti janynan jedel shtab qurylyp, oqıǵa ornyna Otyrar aýdany ákimdigi, aýdandyq tótenshe jaǵdaılar bólimi, orman sharýashylyǵy jáne eriktiler joldanyp, birden izdestirý sharalaryna kirisken. Izdestirý sharalaryna barlyǵy 150 adam, 18 tehnıka, 2 dron jáne 6 júzý quraly jumyldyryldy. Oblys ákiminiń orynbasarlary oqıǵa ornynda bolyp, tıisti nusqaýlyqtar júrgizgen.
Oblystyq tótenshe jaǵdaılar departamenti qyzmetkerleri men eriktiler aýdan turǵyndaryna jaz boıy bul jerge sýǵa túsýge bolmaıtyndyǵy jaıly jan-jaqty eskertýler júrgizgen. Anyqtalǵandaı, mundaı túsindirý jumystaryna dál osy áýlet te qatysqan. Alaıda ruqsat etilmegen orynda demalýdyń zardaby men saqtyq sharalaryn eskermeýdiń saldary qaıǵyǵa ulasyp otyr. Tótenshe jaǵdaılar mınıstri Syrym Sháriphanov Syrdarııa ózenine adamdardyń batyp ketý oqıǵasy boıynsha tergeý amaldary júrip jatqanyn aıtty. «Qazir izdeý jalǵasyp jatyr. Sonymen qatar tergeý organdary bul oqıǵanyń sebebin anyqtaýǵa kiristi. Qaıǵyly oqıǵa bolǵan jerde sýǵa shomylý úshin tıisti jaǵdaı jasalmaǵan. Laýazymdy adamdardyń jaýapkershiligi tekserýden keıin anyqtalady», dedi jýrnalıster suraǵyna jaýap bergen mınıstr.
Aıta ketelik, Otyrar aýdanynda sońǵy úsh jylda tilsiz jaý – sýǵa batý oqıǵasy oryn almaǵan. Al qaıǵyly jaǵdaıǵa ushyraǵandar – 240 turǵyny bar shaǵyn aýyldyń turǵyndary. Jalpy, oblys aýmaǵyndaǵy sý nysandarynyń sany – 4 334. Onyń ishinde 42 sý qoımasy, 149 iri jáne kishi ózen, 25 kól, 2 870 kanal jáne 1 248 qashyrtqy bar.
Túrkistan oblysy
