Foto: kabar.kg
Amanjol Áltaev áleýmettik jelide Qyrǵyzstan Prezıdenti at mingizgen qazaq aqyny Birjan Qaldybaevty synap, jazba jarııalaǵan edi. Onda ol Birjannyń muqym qazaq eliniń atynan dombyra ustap sóıleıtindeı jóni joq edi deıdi.
«Qazaq aıtys ónerinde mundaı aqyn joq. Másele bul jigittiń tanymal bolmaǵanynda emes. Eger kesek oı aıtsa, kórkem óleń órip naqyshyn keltire sóılese, tilenip at suramasa, tileýin tilep tek qýanar edik. Qyrǵyz eliniń ystyq peıiline raqmet! Biraq, kim kóringendi kósheden taýyp alyp, qazaq eliniń aqyny dep el aldyna shyǵarmaýyn suraımyz. Qazaq eliniń aıtys aqyndary men jyrshy - termeshiler odaǵynyń tóraǵasynyń birinshi orynbasary retinde málimdeımin. Qazaq halqynyń bekzat óneriniń qunyn olaı túsirmeýlerin talap etemin.
Aqyndyq talanty joq mundaı pysyqaılar eshkimge de opa ápermeıdi. Endigi jerde qyrǵyz baýyrlar eki eldiń aıtys aqyndary odaǵynyń arasyndaǵy qol qoıylǵan memorandýmǵy erejeni saqtaýdy, bizder usynǵan aqyndy ǵana halyq aldyna shyǵarýlaryn suraımyz. Qustyń qos qanatyndaı baýyrlas elderdiń dostyǵyn jalǵan óleńshiler emes, naǵyz qurmetke laıyq daryndy aqyndar jyrlasyn. Birjan baýyrymyz elge jetken soń halyqtan, barsha aıtys aqyndarynan keshirim suraýdy umytpasyn», dep jazdy Amanjol Áltaev.
Qyrǵyzstan Prezıdenti «Kabar» agenttigine bergen suhbatynda Amanjol Áltaevtyń osy synyna jaýap berdi.
«Amanjol Áltaevtyń áleýmettik jelidegi úndeýin men de oqydym. Árıne, bul yńǵaısyz úndeý boldy. Eń aldymen «Elshige de, ánshige de ólim joq» deıdi. Elshiler óz jumysyn jasaıdy. Ánshiler, tipti, aqyndar ózderine yńǵaıly jerde án salady. Syn aıtyp án salady, madaqtap án salady, birdeńe suraý úshin án salady. Odan kemshilik, saıasat izdeýdiń qajeti joq. Ekinshiden, aqyn Birjan Qaldybaev qyrǵyzdyń jıeni. Men qazaqtyń jıenimin. Biz týysqanbyz. Besinshi atam Soltonquldyń áıeli Noocha qazaqtyń qyzy edi. Úshinshiden, biz qyrǵyz-qazaqsha sóıleıtin halyqpyz. Sol sátte arǵymak syıǵa tartpasam, ol maǵan bir kezde án shyrqaıtyn edi. «Naǵashym jaıaý jiberdi dep aıtar edi. Ol jerge qatyspasam, sol aqynnyń ánin estimesem, áńgime basqa bolar edi. Sondyqtan Amanjol myrzaǵa aıtarym, siz eshqashan jaısyz jaǵdaıǵa tap bolǵan joqsyz», dedi ol.
Sadyr Japarov bul jerde eshqandaı saıasat joq ekenin jáne aıtysker aqynnyń sózine túsip qalmas úshin ǵana arǵymaq syılaǵanyn aıtty.
«Men Birjan Qaldybaevtyń qandaı aqyn ekenin de bilmeımin. Men ony buryn da tanymaıtynmyn. Ony kóshe aqyny dep ataǵan. Qazir kóshe aqyny bolsa, keıin qazaq-qyrǵyz halqyna tanymal aqyn bolyp keter. «Besiktegi bala patsha bola ma, kim bilsin, qursaǵyndaǵy bala patsha bola ma, kim bilsin» deıdi. Ol jas bala eken. Qoldaý bolsa aqyry ataqty aqyn bolyp shyǵar. Qazaq pen qyrǵyzdy bizden basqa eshkim qoldamaıdy. Biz bir-birimizge qoldaý kórsetýimiz kerek. Qazirgi álemdik jaǵdaı ótkir. Qazaq pen qyrǵyzdyń arasyna ot salǵysy keletin úshinshi kúshter áli de joq emes. Biz mundaı adasýshylyqtan aýlaq bolýymyz kerek. Aramyzdaǵy tynyshtyqty saqtaıyq. Onsyz da at tóbelindeı ǵana elmiz», dep jaýap berdi Qyrǵyzstan Prezıdenti.
