Foto: ashyq derekkóz
«Jumysqa ózimizdiń shıkizatty, taýarlar men kadrlardy, basqasha aıtqanda, barlyq ishki múmkindikterimizdi paıdalaný qajet. Biz jańa ónerkásip saıasaty arqyly jańasha damý úlgisine kóshýge tıispiz», dep aıtap ótti Prezıdent.
Qasym-Jomart Toqaevtyń aıtýynsha, memleket iri kásiporyndarmen birlesip, óndiristiń barlyq satysy óz elimizde bolýyn qamtamasyz etýi kerek. Ol úshin óndiris salasyn retteıtin jáne yntalandyratyn túrli tásilderdi qoldaný shart. Máselen, óńdeý ónerkásibi shıkizatty kóńilge qonymdy baǵamen ári jetkilikti kólemde alýy kerek.
«Sonymen birge retteletin satyp alý kezindegi óz taýarlarymyzdyń úlesin arttyrý jáne ofteık júıesin tolyq iske qosý qajet. Elimizdegi ónim óndirýshilermen jasalatyn ofteık kelisim-sharttardyń úlesin keminde 10 paıyzǵa jetkizý kerek. Bul – jyl saıyn 2 trıllıon teńge degen sóz», dep naqtylady Memleket basshysy.
Prezıdent atap ótkendeı, búginde kóptegen elder ishki naryqty qorǵaý sharalaryn belsendi qoldanyp keledi. Damyǵan memleketterdiń ózi proteksıonıstik ónerkásip saıasatyna kóshti. Osy tusta Qasym-Jomart Kemeluly Dúnıejúzilik saýda uıymy usynǵan derekterdi ortaǵa saldy.
«Dúnıejúzilik saýda uıymynyń baǵalaýynsha, bizdiń eldegi ishki naryqty qorǵaý deńgeıi tómen, nebári 128 tarıftik emes shara. Sondyqtan biz saýda-sattyq saıasatynda jańa ári batyl qadam jasaýymyz kerek. Memleket otandyq ónim óndirýshilerdi qorǵaýǵa mindetti. Bul – bizdiń ekonomıkamyz ózgeler úshin jabyq degen sóz emes. Ekonomıkamyz basqa elderge árdaıym ashyq bolýǵa tıis. Biraq ulttyq bıznestiń múddesin qorǵaý kerek», dep túıindedi el Prezıdenti.
