«Aımaqtaǵy atqarýshy bıliktiń sheshim qabyldaý isine azamattardyń tikeleı qatysý múmkindigin birtindep arttyrý da mańyzdy. Aýyl, kent jáne aýyldyq okrýg ákimderin turǵyndar ózderi saılaı bastaǵanyna eki jyldan asty. Sodan beri aýyldyq deńgeıdegi ákimderdiń tórtten úshi saılandy. Endi aýdan jáne oblystyq deńgeıdegi qala ákimderin saılap kóremiz», dedi Memleket basshysy.
Osyǵan oraı Ortalyq saılaý komıssııasynyń tóraǵasy Nurlan Ábdirov jýrnalıstermen ótkizgen brıfıngte aýdan jáne oblystyq deńgeıdegi qala ákimderin saılaýǵa qatysty pikirin bildirdi.
«Ortalyq saılaý komıssııasy aýmaqtyq saılaý komıssııalarymen birigip, aýdan jáne oblystyq deńgeıdegi qala ákimderin saılaýǵa tıisti daıyndyq jumystaryn júrgizip jatyr. Saılaýdy ótkizýge tolyq daıynbyz. Qaı oblystarda, aýdandarda saılaý ótkizetinin jergilikti oblystyq máslıhattar sheshedi. Ortalyq saılaý komıssııasy bul saılaýdyń qatań túrde zańǵa saı ótýine bar kúshin salady», degen komıssııa tóraǵasy jýrnalısterdiń suraqtaryna jaýap berdi. «Saılaý ár óńirde ártúrli merzimde óte me?» degen saýalǵa Nurlan Ábdirov: «Árıne, saılaýdy uıymdastyrýshy organ retinde bizge saılaýdyń bir ýaqytta ótkeni qolaıly bolar edi. Áıtse de, oblystyq máslıhattardyń sheshimin kútemiz. Zań boıynsha saılaýǵa daıyndyq jáne ony ótkizý merzimi 50 kúnnen kem bolmaýy kerek. Saılaýdy keminde eki aı ishinde ótkizýimiz kerek», dep jaýap berdi.
Al «Saılaý osy jyldyń sońyna deıin óte me?» degen suraqqa: «Biz de jyldyń sońyna deıin ótedi dep boljap otyrmyz», dep jaýap bergen Nurlan Ábdirov qalaı bolǵanda da bári oblystyq máslıhattardyń sheshimderine baılanysty ekenin eske saldy.
Ortalyq saılaý komıssııasy tóraǵasynyń pikirinshe, «Qazaqstan Respýblıkasyndaǵy saılaý týraly» zańǵa sáıkes elimizde tirkelgen saıası partııalar aýdan jáne oblystyq deńgeıdegi qala ákimderi saılaýynda ózderiniń ókilderin usynýǵa quqyly. Biraq árbir okrýg bir ǵana kandıdat usyna alady. Sondaı-aq Nurlan Ábdirov elimizde táýelsiz baıqaýshylar ınstıtýty jaqsy damyp kele jatqanyn, jyldan-jylǵa olardyń qatary da, qyzmet sapasy da artqanyn atap ótti.
«Táýelsiz baıqaýshylar óz qyzmetin joǵary deńgeıde zańǵa saı ótkizýi kerek. Sol sebepti, qoǵamdyq birlestikter olardy sapaly daıyndap jatyr», dedi Ortalyq saılaý komıssııasynyń tóraǵasy.
