Qysqy qaıyrymdylyq baly – dástúrli túrde bıznestiń, dıplomatııalyq korpýstyń, qoǵamdyq jáne saıası toptardyń ókilderin jınaıtyn óz tarıhy bar biregeı bal. 11 jyl boıy baldyń qonaqtary klassıkalyq valsten latınoǵa deıin debıýtanttardyń bıi, saltanatty keshki as, baǵaly lottar aýksıony, sondaı-aq is-sharanyń seriktesterinen júldeler utys oıyny bar ǵajaıyp atmosferaǵa bólenedi.
Bıyl Qysqy qaıyrymdylyq bal is-sharalarynyń bastalýy, atap aıtqanda, debıýtanttar kastıngi Qallekı teatrynda saltanatty túrde ótti. XIV Qysqy qaıyrymdylyq balynyń debıýtanty atanýdyń qurmeti úshin 300-ge jýyq adam tartysty. Eske salsaq, buǵan deıingi ýaqytta debıýtanttar kastıngine 6 myńnan astam úmitker qatysty, al balǵa 148 jup debıýtant baq synady. Ǵajaıyp keshtiń sebep bolýymen 6 jup debıýtant joldary túıisip, shańyraq kóterdi.
Irikteýdiń eki kezeńinen – horeografııalyq baıqaýdan jáne uıymdastyrýshylarmen áńgimelesýden sátti ótken 30 úmitker debıýtant atandy. Olar endi úsh aı boıy balda oryndaıtyn ártúrli kásibı bal bılerin úırenedi. Debıýtanttardy bıge Qysqy qaıyrymdylyq baldaryn qoıýshy-horeograf, horeografııa fakýlteti dekanynyń orynbasary, Qazaq ulttyq horeografııa akademııasynyń aǵa oqytýshysy – Evgenıı Moıseev daıyndaıdy.
«Osy baldyń arqasynda biz quqyqtar men múmkindikter teń ınklıýzıvti, ashyq qoǵam quryp jatyrmyz. Baldardan túsken qarajatqa erekshe balalary bar otbasylardyń ómir súrý sapasyn, ınklıýzıvti bilim berý salasynda mamandardy daıarlaý sapasyn jáne sonyń nátıjesinde ınklıýzıvti bilim berý salasynda kórsetiletin qyzmetterdiń sapasyn arttyratyn búkil álemde qabyldanǵan ozyq álemdik tájirıbelerdi, ǵylymı dáleldengen tıimdi ádistemelerdi engizedi. Sonymen qatar el boıynsha ınklıýzıvti alańdar jelisin qurdyq. Eldegi tuńǵysh minez-qulyq taldaýshylaryn oqyttyq, búgingi tańda endi olar erekshe balalarmen jumys isteıtin júzdegen pedagogter men mamandardy oqytyp jatyr», deıdi «Bolashaq» korporatıvtik qory Qamqorshylyq keńesiniń tóraıymy Dınara Gaplan.
Jınalǵan qarajat «Bolashaq» qorynyń erekshe qajettilikteri bar balalar men daryndy jastarǵa arnalǵan «Ár bala mektepke barýǵa laıyqty» jáne «Jol júrý granttary» qaıyrymdylyq baǵdarlamalaryna baǵyttaldy. XIV Qysqy qaıyrymdylyq balyna «Nurbank» AQ jáne «Hilton Astana» qonaqúıi demeýshilik kórsetti. Sonymen qatar «Amanat» partııasy men «The sun» dıdjıtal agenttigi kastıngke qoldaý kórsetti. XIV Qysqy qaıyrymdylyq baly Astanada 8 jeltoqsanda «Hilton Astana» qonaqúıinde ótedi.
Aıta keteıik, baldar ótkizilgen 11 jyl ishinde 150-den astam demeýshi men seriktes tartylyp, 880 mıllıon teńgeden astam qarajat jınady. Túsken qarajatqa 85 mamandandyrylǵan ońaltý mekemesi ashyldy jáne jaraqtandyryldy, onyń ishinde búkil Qazaqstan boıynsha 56 ınklıýzııany qoldaý kabıneti ashylyp, aýtızm jáne damýynda basqa erekshelikter bar 800-den astam bala mektepke barýǵa múmkindik aldy. 3000-nan astam maman oqytylyp. 500-den astam jumys orny quryldy. Az qamtylǵan otbasylardan shyqqan balalarǵa jáne erekshe qajettilikteri bar adamdarǵa 120-dan astam bilim berý jáne jol júrý granttary berildi. Sondaı-aq «Bolashaq» qory ınklıýzıvti bilim berýdi damytýǵa qatysty Qazaqstan Respýblıkasynyń zańnamalyq aktilerine 80-nen astam sapaly usynystar men túzetýler engizdi.
