Foto: https://senate.parlam.kz/
M.Áshimbaev Albanııa Qazaqstannyń Balqan túbegindegi mańyzdy jáne senimdi seriktesteriniń biri ekenin aıtty. Eki el parlamentaralyq deńgeıde, onyń ishinde halyqaralyq uıymdar aıasynda ózara is-qımyldy odan ári arttyrý mańyzdy ekenine nazar aýdardy.
«Ekijaqty qarym-qatynasymyzdyń mańyzdy baǵyttarynyń biri parlamentaralyq baılanys ekeni anyq. Bizdiń Parlamenttiń eki Palatasynda da Albanııamen dostyq toby qurylǵan. Albanııa Parlamentinde de osyndaı qurylym qurý ózara seriktestigimizdi odan ári nyǵaıtýǵa yqpal eter edi. Biz tek ekijaqty formatta ǵana emes, sonymen birge EQYU Parlamenttik Assambleıasy, Parlamentaralyq Odaq sııaqty halyqaralyq parlamenttik uıymdar aıasynda da birlesip jumys isteýge daıynbyz», dedi M.Áshimbaev.
Kezdesýde taraptar halyqaralyq jáne óńirlik kún tártibindegi aýqymdy baǵyttarǵa nazar aýdardy. Saýda-ekonomıkalyq jáne mádenı-gýmanıtarlyq máselelerge de basa mán berildi. Senat Tóraǵasy Palatanyń Memleket basshysynyń bastamasymen qolǵa alynǵan reformalardy iske asyrýǵa arnalǵan zańnamalyq jumysy týraly aıtty. Albanııa Prezıdenti Qazaqstanda júrgizilip jatqan qoǵamdyq-saıası ózgeristerdi joǵary baǵalap, barlyq baǵytta yntymaqtastyqty keńeıtýge múddeli ekenin bildirdi.
