Foto: Ortalyq kommýnıkasııalar qyzmetiniń baspasóz qyzmeti
«Estetıkalyq gımnastıka - densaýlyq aspektisine negizdelgen eń ádemi sport túri. Ol álemde ótken ǵasyrdyń elýinshi jyldarynan bastap damı bastady, Fınlıandııada paıda boldy. 2003 jyldan bastap Halyqaralyq estetıkalyq toptyq gımnastıka federasııasy bar. Qazirgi ýaqytta onyń quramyna 49 el kiredi, osy sport túriniń Olımpıada oıyndarynyń baǵdarlamasyna enýi úshin úlken áleýet bar», dedi federasııa basshysy.
Qazaqstanda estetıkalyq toptyq gımnastıka federasııasy 2018 jyly qurylǵan. 2020 jyly sport mınıstrliginiń akkredıtasııasyn aldy. Bul sport qyz balalardyń boıynda basqa qyzdarmen yntymaqtasa bilý qabiletin qalyptastyrady.
«Sońǵy bes jylda Qazaqstan tipti pandemııaǵa da qaramastan osy sport túrinen úlken serpilis jasady. Byltyr bizdiń qyzdar Avstrııada ótken Álem chempıonatynyń qola júldegeri atandy, sondaı-aq Azııa chempıonatynda jeńiske jetti», dedi M.Bekturǵanova.
Spıkerdiń aıtýynsha, qysqa merzim ishinde Qazaqstanda 154 sport sheberi, 54 halyqaralyq dárejedegi sport sheberi, 25 ulttyq tóreshi, 5 halyqaralyq dárejedegi tóreshi tárbıelengen. Búginde osy sport túrimen shuǵyldanatyndardyń jalpy sany 1500 adamdy qurap otyr.
Federasııa byltyr elimizdiń túkpir-túkpirinde, onyń ishinde shalǵaıdaǵy aýyldarda osy sport túrin damytý boıynsha ulttyq jobany qolǵa alǵan. Jyl saıyn qyzdardy tartý, sondaı-aq jattyqtyrýshylardy daıarlaý úshin úsh oblysty qamtyp otyrý josparlanǵan. Byltyr pılottyq jobaǵa Abaı oblysynan úsh aýyl – Aqsýat, Qaraýyl, Qalbataý qosyldy. Aqmola oblysynda Aqkól, Shortandy, Aqmol aýyldary, Qaraǵandy oblysynda Shahtınsk qalasy qamtylǵan.
«Osy jyldyń 1 maýsymynda biz sabaqqa tartylǵan balalardyń qatysýymen úlken festıval ótkizdik. Joba aıasynda 7 jattyqtyrýshy oqytyldy. Bul ortalyqtardyń barlyǵy kilemdermen, mýzykalyq ortalyqtarmen, sondaı-aq balalarǵa arnalǵan kıim, jabdyqtarmen qamtamasyz etildi. Jańa oqý jylynan bastap bizge taǵy úsh oblys – Batys Qazaqstan (Oral), Pavlodar (Ekibastuz), Qostanaı (Rýdnyı) qosyldy», dedi federasııa basshysy.
